નવી દિલ્હી: કેન્દ્ર સરકારે તાત્કાલિક અસરથી પૂજા ખેડકરને ભારતીય વહીવટી સેવા (IAS)માંથી હટાવી દીધા છે. પૂજા ખેડકર પર છેતરપિંડીનો અને અન્ય પછાત વર્ગ (OBC) અને વિકલાંગ ક્વોટાનો ખોટી રીતે લાભ લેવાનો આરોપ છે.
કેન્દ્રએ UPSC પરીક્ષામાં OBC અને વિકલાંગતા ક્વોટાનો દુરુપયોગ કરવા બદલ પૂજા ખેડકર વિરુદ્ધ કાર્યવાહી કરી છે. સૂત્રએ જણાવ્યું કે કેન્દ્ર સરકારે IAS (પ્રોબેશન) નિયમો, 1954ના નિયમ 12 હેઠળ તાત્કાલિક અસરથી પૂજા મનોરમા દિલીપ ખેડકર, IAS પ્રોબેશનર (MH:2023) ને ભારતીય વહીવટી સેવા (IAS)માંથી તાત્કાલિક અસરથી મુક્ત કર્યા છે.
પૂજા ખેડકરની કાનૂની મુશ્કેલીઓ ત્યારે શરૂ થઈ જ્યારે એવો આક્ષેપ કરવામાં આવ્યો કે તેણીએ અનામત લાભો મેળવવા માટે UPSC સિવિલ સર્વિસ પરીક્ષા 2022 માટે તેની અરજીમાં ખોટી માહિતી સબમિટ કરી હતી. UPSC અને દિલ્હી પોલીસે તેના પર 2022 અને 2023ની પરીક્ષા માટે બે અલગ-અલગ દસ્તાવેજોનો ઉપયોગ કરીને નકલી વિકલાંગતા પ્રમાણપત્રો સબમિટ કરવાનો આરોપ મૂક્યો છે.
અગાઉ, 31 જુલાઈના રોજ, યુનિયન પબ્લિક સર્વિસ કમિશને ખેડકરની ઉમેદવારી રદ કરી હતી અને તેમને ભવિષ્યની પરીક્ષાઓમાંથી દૂર કરી દીધા હતા. યુપીએસસીએ અગાઉ કહ્યું હતું કે તેણે કમિશન અને જનતા સામે છેતરપિંડી કરી હતી અને કાવતરાની સંપૂર્ણ હદનો પર્દાફાશ કરવા માટે તેની કસ્ટોડિયલ પૂછપરછ જરૂરી હતી.
જોકે ખેડકરે તમામ આરોપોને નકારી કાઢ્યા છે. ગુરુવારે, ખેડકરે દિલ્હી હાઈકોર્ટને કહ્યું કે તે AIIMSમાં તેની તબીબી તપાસ કરાવવા માટે તૈયાર છે જ્યારે દિલ્હી પોલીસે દાવો કર્યો હતો કે પૂજાનું અપંગતા પ્રમાણપત્રોમાંથી એક 'બનાવટી' અને 'બોગસ' હોઈ શકે છે. ખેડકર તરફથી હાજર રહેલા વરિષ્ઠ વકીલે કહ્યું કે તેઓ તેમની મેડિકલ તપાસ કરાવવા માટે તૈયાર છે. તેણે આ અરજી ત્યારે કરી જ્યારે કોર્ટ ફોજદારી કેસમાં તેની આગોતરા જામીન અરજી પર વિચાર કરી રહી હતી.
તમને જણાવી દઈએ કે યુનિયન પબ્લિક સર્વિસ કમિશન (UPSC) એ ઓગસ્ટ મહિનામાં પૂજા ખેડકર વિરુદ્ધ કાર્યવાહી કરી હતી. બનાવટી ઓળખ આપીને સિવિલ સર્વિસ પરીક્ષામાં બેસવા બદલ ખેડકર સામે ફોજદારી કેસ પણ દાખલ કરવામાં આવ્યો હતો. દિલ્હી પોલીસે ઇન્ડિયન પીનલ કોડ, ઇન્ફોર્મેશન ટેક્નોલોજી એક્ટ અને રાઇટ્સ ઑફ પર્સન્સ વિથ ડિસેબિલિટી એક્ટની જોગવાઈઓ હેઠળ FIR નોંધી છે.
શું કહ્યું સામાજિક કાર્યકર વિજય કુંભારે?
દરમિયાન, મહારાષ્ટ્રના સામાજિક કાર્યકર્તા વિજય કુંભારે પોતાની પ્રતિક્રિયા આપતા કહ્યું કે, IAS સેવામાં જોડાવા માટે પૂજા ખેડકરે જે કંઈ કર્યું તે ગુનો કહેવાય છે. આ બાબતને પ્રકાશમાં લાવનાર સામાજિક કાર્યકર વિજય કુંભારે કહ્યું કે સારું છે કે આજે ભગવાન ગણેશના આગમનના દિવસે આ દુષ્ટ વલણનો અંત આવ્યો છે. આ કેસોએ સાબિત કર્યું કે જો યોગ્ય રીતે તપાસ કરવામાં આવે તો આવા ઉચ્ચ સુરક્ષા અધિકારીઓને પણ સેવામાંથી દૂર કરી શકાય છે.
