অসমৰ বাবে কাম কৰি শ্বহীদৰ ত্যাগক উচিত মূল্য দিব লাগিব:জেৰীফা ৱাহিদ

বৃহস্পতিবাৰৰ পৰা আৰম্ভ হৈছে ৰাইজৰ দলৰ প্ৰথম ৰাজ্যিক অভিৱৰ্তন ৷ মৰাণৰ লাচিত বৰফুকন সমন্বয় ক্ষেত্ৰত ৰাজ্যৰ বিভিন্ন প্ৰান্তৰ পৰা ৰাইজ আহি অংশ গ্ৰহণ কৰিছেহি ৰাইজৰ দলৰ প্ৰথম ৰাজ্যিক অভিৱৰ্তনত ৷ আন্তঃৰাষ্ট্ৰীয় খ্যাতি সম্পন্ন বোলছবি পৰিচালক জাহ্নু বৰুৱাই পতাকা উত্তোলন কৰাৰ পাচতে উপস্থিত হৈছে বিভিন্ন দল সংগঠনৰ নেতা কৰ্মীৰ লগতে অসমীয়া বোলছবি জগতৰ জনপ্ৰিয় অভিনেত্ৰী জেৰীফা ৱাহিদো৷ 'ৰাইজৰ দল'ৰ প্ৰথম ৰাজ্যিক অভিৱৰ্তনত অংশ লৈ জনপ্ৰিয় অভিনেত্ৰী গৰাকীয়ে অসমৰ ভবিষ্যতক লৈ উদ্বেগ প্ৰকাশ কৰি কয়, এতিয়া অসমৰ কথা ভবাৰ সময় ৷ গতিকে ৰাইজৰ দলৰ লগত জড়িত সকলো দল-সংগঠনে নিজৰ কথা নাভাবি অসমৰ কথা ভাবিবৰ হ'ল ৷ 'কা' আন্দোলনৰ শ্বহীদ সকলক স্মৰণ কৰি অভিনেত্ৰী গৰাকীয়ে কয় শ্বহীদ সকলৰ ত্যাগক আমি মূল্য দিব লাগিব । শ্বহীদ মাতৃৰ বুকু শুদা হোৱা আৰু পৰিয়ালৰ দুখক আমি সকলোৱে একগোট হৈ অসমৰ বাবে কাম কৰি তাৰ উচিত মূল্য দিব লাগিব ।