নাৰী নিৰ্যাতন; স্বামী আৰু দেৱৰেকৰ প্ৰহাৰত গুৰুতৰভাৱে আহত মহিলা

ৰাজ্যত পুনৰ নাৰী নিৰ্যাতনৰ ঘটনা ৷ চাপৰৰ পালপাৰাত এগৰাকী মহিলাক গাত কেৰাচিন তেল ঢালি জ্বলাই দিয়াৰ অপচেষ্টা কৰে মহিলাগৰাকীৰ স্বামী আৰু দেৱৰেকে ৷ এই অভিযোগ তৰিছে ভুক্তভোগী মহিলাগৰাকীয়ে ৷ এই ঘটনাক কেন্দ্ৰ কৰি সৃষ্টি হৈছে তীব্ৰ চাঞ্চল্যৰ ৷ অভিযোগ অনুসৰি, দীৰ্ঘদিন ধৰি ভুক্তভোগী মহিলাগৰাকীৰ স্বামী ভজহৰি বিশ্বাস আৰু দেৱৰেক পিলু বিশ্বাসে মদ খাই আহি পত্নী তথা বৌৱেকক শাৰীৰিক আৰু মানসিক অত্যাচাৰ কৰি আহিছে ৷ বিগত বহু বছৰে এই অত্যাচাৰ সহ্য কৰি আহিছিল ভুক্তভোগী গৰাকীয়ে ৷ ঘটনাৰ বিৱৰণি অনুসৰি, বুধবাৰে সামান্য এটা কথাতে স্বামী-স্ত্ৰীৰ মাজত কাজিয়াৰ সূত্ৰপাত ঘটে ৷ সেই কাজিয়াই পৰৱৰ্তী সময়ত ভয়ংকৰ ৰূপ লয় ৷ আনকি মহিলাগৰাকীক তেওঁৰ স্বামী ভজহৰি বিশ্বাস আৰু দেৱৰ পিলু বিশ্বাসে মাৰধৰ কৰাৰ লগতে কেৰাচিন তেল গাত ঢালি দি জ্বলাই দিয়াৰো অপচেষ্টা কৰে । পৰৱৰ্তী সময়ত চেগ বুজি ভুক্তভোগী মহিলাগৰাকীয়ে মাকৰ ঘৰলৈ পলাই আহিবলৈ সক্ষম হয় ৷ ইফালে স্বামী আৰু দেৱৰেকৰ প্ৰহাৰত গুৰুত্বৰভাৱে আঘাত প্ৰাপ্ত মহিলাগৰাকীক মাতৃ পৰিয়ালে চিকিৎসাৰ ব্যৱস্থা কৰাৰ লগতে স্বামী ভজহৰি বিশ্বাস আৰু দেৱৰ পিলু বিশ্বাসৰ বিৰুদ্ধে চাপৰ থানাত দাখিল কৰে এখন এজাহাৰ ৷ ভুক্তভোগী মহিলাগৰাকীৰ আত্মীৰ দাবী, দোষীক আটক কৰি কঠোৰ শাস্তি প্ৰদান কৰক চাপৰ আৰক্ষীয়ে ৷