বৰাকত অসমীয়া ভাষাক অপমান কৰা কাৰ্যক লৈ প্ৰতিক্ৰিয়া টাই আহোম যুৱ পৰিষদৰ

অসমীয়া আৰু বঙালী সম্প্ৰদায়ৰ লোকৰ মাজৰ সম্প্ৰীতিত আঘাত হানিবলৈ প্ৰয়াস নকৰিবলৈ তথাকথিত বঙালী সংগঠনক সকীয়াই দিলে টাই আহোম যুৱ পৰিষদ অসমে । বৰাকত অসমীয়া ভাষাক অপমান কৰা কাৰ্যক গৰিহণা দি এনে কাৰ্যৰ পুনৰাবৃত্তি নকৰিবলৈও সকীয়নি দিয়ে সংগঠনটোৱে । উল্লেখ্য যে, বৰাকত চৰকাৰী আঁচনিৰ বেনাৰত অসমীয়া ভাষা ব্যৱহাৰ কৰাৰ বিৰোধিতা কৰি বৰাক উপত্যকাৰ BDYF নামৰ এটা তথাকথিত সংগঠনে বেনাৰত ক'লা ৰং সানি দিছিল । এনে কাৰ্য উচিত নহয় বুলি মন্তব্য কৰিছে টাই আহোম যুৱ পৰিষদে । এই সন্দৰ্ভত সংগঠনটোৰ কেন্দ্ৰীয় সভাপতি বিজয় ৰাজকোঁৱৰে অসমীয়া বিদ্বেষীসকলক ভৱিষ্যতে এনে কাম কৰাৰ পৰা বিৰত থাকিবলৈ সকীয়নি প্ৰদান কৰে ৷ অসমীয়া আৰু বঙালী সম্প্ৰদায়ৰ মাজৰ সম্পৰ্ক বেয়াৰ ফালে নিবলৈ চেষ্টা নকৰিবলৈও কয় কেন্দ্ৰীয় সভাপতিগৰাকীয়ে । বৰাকত অসমীয়া ভাষাক অপমান কৰা কাৰ্যক লৈ এতিয়া ৰাজ্যৰ সাধাৰণ লোকৰ লগতে বিভিন্ন দল-সংগঠনে ক্ষোভ প্ৰকাশ কৰিছে ।