ফেৰী দুৰ্ঘটনাৰ এমাহ : মাজুলীত ৰাজহুৱা শ্ৰদ্ধাঞ্জলি অনুষ্ঠান

অভিশপ্ত নিমাতীঘাট ফেৰী দুৰ্ঘটনাৰ আজি এমাহ সম্পূৰ্ণ হ'ল ৷ অভিশপ্ত দুৰ্ঘটনাটোৱে প্ৰাণ কাঢ়ি নিয়া তিনিজনকৈ লোকৰ প্ৰতি শ্ৰদ্ধাঞ্জলি জনাই শুকুৰবাৰে মাজুলীবাসীয়ে এক শ্ৰদ্ধাঞ্জলি অনুষ্ঠানৰ আয়োজন কৰে ৷ বিগত 8 ছেপ্টেম্বৰত নাও দুৰ্ঘটনাত সলিল সমাধি ঘটা পৰিমিতা দাস, ইন্দ্ৰেশ্বৰ বৰা আৰু বিক্ৰমজিৎ বৰুৱালৈ শ্ৰদ্ধাঞ্জলি জনাই মাজুলীৰ সকলো জাতীয় সংগঠনৰ উদ্যোগত গড়মূৰ মাধৱদেৱ কৃষ্ট কেন্দ্ৰ, খোনাচুকত 'ৰাজহুৱা শ্ৰদ্ধাঞ্জলি জ্ঞাপন অনুষ্ঠান' অনুষ্ঠিত হয় ৷ অনুষ্ঠানত মাজুলীৰ জাতীয় দল-সংগঠনৰ প্ৰতিনিধিয়ে অংশগ্ৰহণ কৰাৰ লগতে শ্ৰদ্ধাঞ্জলি জ্ঞাপন কৰে । তিনিওজন মৃতকৰ আত্মাৰ সদগতি কামনাৰে নাম-প্ৰসংগৰ অনুষ্ঠানো আয়োজন কৰা হৈছে । দুৰ্ঘটনাত প্ৰাণ হেৰুওৱা তিনিওজনৰ স্মৃতিত এখন স্মৃতিগ্ৰন্থও উন্মোচন কৰা হ'ব বুলি শ্ৰদ্ধাঞ্জলি অনুষ্ঠানৰ আয়োজকসকলে জানিবলৈ দিয়ে ৷