জটিল ৰোগত আক্ৰান্ত মেধাৱী ছাত্ৰী স্মৃতি বড়াৰ বাসগৃহত সাংসদ তপন গগৈ

জটিল ৰোগত আক্ৰান্ত হৈ থকা টীয়ক চন্দ্ৰকমল বেজবৰুৱা মহাবিদ্যালয়ৰ মেধাৱী ছাত্ৰী স্মৃতি বড়াৰ ঘৰত উপস্থিত হ'ল যোৰহাট সাংসদীয় সমষ্টিৰ সাংসদ তপন কুমাৰ গগৈ ৷ বৃহস্পতিবাৰে বিয়লি ছাত্ৰী গৰাকীৰ বাসগৃহত উপস্থিত হৈ পৰিস্থিতিৰ বুজ লয় সাংসদ গৰাকীয়ে ৷ আৰ্থিকভাৱে পিছপৰা পৰিয়ালটিৰ জটিল সন্ধিক্ষণত উপস্থিত হৈ সাংসদ গৰাকীয়ে উন্নত চিকিৎসাৰ বাবে সকলো প্ৰকাৰৰ যাৱতীয় ব্যৱস্থা গ্ৰহণ কৰিব বুলি আশ্বাস প্ৰদান কৰে ৷ লগতে ছাত্ৰীগৰাকীৰ দ্ৰুত আশু আৰোগ্য কামনা কৰে সাংসদ তপন কুমাৰ গগৈয়ে ৷ উল্লেখযোগ্য যে, কোনোমতে পেটে ভাতে খাই চলি থকা পৰিয়ালটিৰ জেষ্ঠ কন্যাগৰাকীৰ চিকিৎসাৰ বাবে অসমৰ বহুজন সুহৃদয়বান লোকে আগবঢ়োৱা বৰঙণিৰে ছাত্ৰীগৰাকীক 29 ছেপ্তেম্বৰ তাৰিখে গুৱাহাটী মেডিকেল কলেজ হাস্পতালত ভৰ্তি কৰা হৈছে ৷ ইতিমধ্যেই ছাত্ৰী গৰাকীৰ চিকিৎসা আৰম্ভ হৈছে বুলিও জানিব পৰা গৈছে ৷ সাংসদ গৰাকীয়েও GMCH ৰ কৰ্তৃপক্ষৰ লগত যোগাযোগ কৰি সকলো সা সুবিধাৰ ব্যৱস্থা কৰি দিছে ৷