টিংখাঙত জব্দ অবৈধভাৱে বিক্ৰী কৰিবলৈ অনা গাহৰি পোৱালি

যি সময়ত আফ্ৰিকান চোৱাইন ফ্লু' ৰোগে ৰাজ্যত সংহাৰী ৰূপ ধাৰণ কৰিছে, ঠিক তেনে সময়তে টিংখাঙত সদৌ অসম গাহৰি পালক সন্থাই জব্দ কৰিবলৈ সক্ষম হৈছে অবৈধভাৱে বিক্ৰী কৰিবলৈ অনা গাহৰি । জানিব পৰা মতে, তেজপুৰৰ পিঠাগুড়ি অঞ্চলৰ পৰা পলাস দাস নামৰ এজন ব্যক্তিয়ে কোনো ধৰণৰ নথি-পত্ৰৰ অবিহনে বিক্ৰীৰ বাবে আনিছিল এই গাহৰি পোৱালিসমূহ । উল্লেখ্য যে, তেজপুৰৰ উক্ত অঞ্চলত আজিও আফ্ৰিকান চোৱাইন ফ্লু’ৰ সংক্ৰমণ অব্যাহত আছে । আনহাতে, লক্ষীমপুৰ ধেমাজি আদি অঞ্চলত গাহৰি সৰবৰাহত চৰকাৰী নিষেধাজ্ঞা থকাৰ পাচতো উক্ত পথেৰে গাহৰি পোৱালি সৰবৰাহ কৰি টিংখাঙত বিক্ৰী কৰিবলৈ উপস্থিত হৈছিলহি পলাস দাস ৷ এই অভিযোগ কৰিছে সদৌ গাহৰি পালক সন্থাই ৷ এই ঘটনাক কেন্দ্ৰ কৰি আঞ্চলটোত তীব্ৰ চাঞ্চল্যই বিৰাজ কৰিছে ৷ ইতিমধ্যে সদৌ গাহৰি পালক সন্থাৰ ডিব্ৰুগড় জিলা আৰু টিংখাং আঞ্চলিক সমিতিয়ে টিংখাঙৰ মাহমৰা অঞ্চলত কোনোধৰণৰ নথি পত্ৰ নোহোৱাকৈ বিক্ৰী কৰিবলৈ অনা প্ৰায় ৪৫ টা গাহৰি পোৱালি জব্দ কৰিছে ৷ লগতে ঘটনা সন্দৰ্ভত প্ৰশাসনৰ কাষ চাপিছে সংগঠনটোৱে ।