ষ্ট্ৰীট লাইট স্থাপন হ’ল; কিন্তু পৰ্যাপ্ত পোহৰ নাপালে ৰাইজে

অসম চৰকাৰে গাঁও পঞ্চায়তৰ জৰিয়তে গ্ৰামাঞ্চলৰ প্ৰতিটো অঞ্চল পোহৰাই তোলাৰ লগতে গ্ৰামাঞ্চলৰ পথত যাতে কোনো ধৰণৰ অপ্ৰীতিকৰ ঘটনা সংঘটিত নহয় তাৰ বাবে পথৰ কাষত স্থাপন কৰিছিল ষ্ট্ৰীট লাইট । পঞ্চায়ত আৰু গ্ৰামোন্নয়ন বিভাগে প্ৰতিটো ষ্ট্ৰীট লাইটৰ বিনিময়ত আৱণ্টন দিছে ৩৫ হাজাৰতকৈ অধিক টকা । কিন্তু পঞ্চায়তে যোগান ধৰা ষ্ট্ৰীট লাইটৰ নামত ঠিকাদাৰে নিম্নমানৰ ষ্ট্ৰীট লাইট যোগান ধৰি ব্যাপক অনিয়ম সংঘটিত কৰাৰ অভিযোগ উত্থাপন হৈছে । তিনিচুকীয়া জিলাৰ ফিল'বাৰীত ষ্ট্ৰীট লাইটৰ নামত দুৰ্নীতি হোৱাৰ অভিযোগ কৰিছে স্থানীয় ৰাইজে । ফিল'বাৰী অঞ্চলত বৰ্তমান সময়লৈকে সৰ্বাধিক ষ্ট্ৰীট লাইট বিকল হৈ আছে । বিজুলীবন গাঁও পঞ্চায়তে ফিল'বাৰী-পেঙেৰী সংযোগী পথত স্থাপন কৰা অধিকাংশ ষ্ট্ৰীট লাইট বৰ্তমান সময়ত বিকল হৈ আছে । গাভৰুভেটি আৰু বিজুলীবন গাঁও পঞ্চায়ত প্ৰায় বিলাক ষ্ট্ৰীট লাইট এতিয়া বিকল হৈ পৰিছে ৷