Wild Elephant Damaging Tourist Car:কোথাগিৰি-মেট্টুপালায়াম ৰাজপথত বনৰীয়া হাতীৰ উপদ্ৰৱ

নেশ্যনেল ডেস্ক, 26 অক্টোবৰ : তামিলনাডুৰ নীলগিৰি জিলাৰ কোথাগিৰি-মেট্টুপালায়াম ঘাইপথত ২৫ অক্টোবৰত সংঘটিত হয় এক আচৰিত ঘটনা ৷ কিলথাট্টাপল্লাম অঞ্চলটোত এটা বনৰীয়া হাতীয়ে বিধ্বংসী ৰূপ ধাৰণ কৰে ৷ এই নাটকীয় ঘটনাটোৰ এটা ভিডিঅ’ এতিয়া ভাইৰেল হৈ পৰিছে ।

দৰাচলতে অৰণ্যৰ পৰা এটা বনৰীয়া হাতী অকস্মাতে আক্ৰমণাত্মক ৰূপত ৰাজপথলৈ ওলাই আহিল । ৰাষ্ট্ৰীয় ঘাইপথত হঠাতে হাতীটোৰ আবিৰ্ভাৱে মটৰচাইকেল আৰোহী আৰু পথচাৰী সকলোকে আচৰিত কৰি তোলে ৷

কোথাগিৰিৰ পৰা মেট্টুপালায়ামলৈ যাত্ৰা কৰি থকা কেইজনমান পৰ্যটকে তেওঁলোকৰ যাত্ৰাপথত এই হাতীটোৰ সৈতে মুখামুখি হয় ৷ বৃহদাকায় জন্তুটোৱে গাড়ীখন দেখা পাই আক্ৰমণাত্মকভাৱে সেইখনৰ ফালে চোঁচা লয় ৷ নিজক বচাবলৈ পৰ্যটক কেইজনে গাড়ী তাতে এৰি পলায়ন কৰে ৷

সমগ্ৰ ঘটনাটো ভিডিঅ’ত বন্দী কৰিছিল ৰাজপথত থকা আন মটৰচাইকেল আৰোহীয়ে । ভিডিঅ’ ফুটেজটোত বনৰীয়া হাতীটোৱে গাড়ীখনৰ পিছ লোৱা আৰু শেষত গাড়ীখনৰ ক্ষতি কৰাটো স্পষ্টভাৱে দেখা গৈছে । গাড়ীখনত থকা লোকসকলে কোনো আঘাত নোপোৱাকৈয়ে পলায়ন কৰিবলৈ সক্ষম হয় আৰু সৌভাগ্যক্ৰমে এই নাটকীয় মুখামুখিত কোনো লোকৰ মৃত্যু বা আহত হোৱাৰ খবৰ পোৱা নগ’ল ।

লগতে পঢ়ক : Elephant menace: হোষ্টেলৰ পৰা ঘৰলৈ বুলি অহা জীয়েকে লগ নাপালে আইক