কালিকা লগা শনিবাৰ : নুমলীগড়ৰ 37 নং ৰাষ্ট্ৰীয় ঘাইপথত পথ দুৰ্ঘটনাত নিহত 1 আহত 2

গোলাঘাট, 23 ডিচেম্বৰ : শনিবাৰে শনি লাগিল নুমলীগড়ৰ 37 নং ৰাষ্ট্ৰীয় ঘাইপথত ৷ শনিবাৰে গোলাঘাট জিলাৰ নুমলীগড়ৰ 37 নং ৰাষ্ট্ৰীয় ঘাইপথত সংঘটিত হয় এক ভয়ংকৰ পথ দুৰ্ঘটনা । এই দুৰ্ঘটনাত এজন লোক নিহত হোৱাৰ লগতে আন দুজন গুৰুতৰভাৱে আহত হৈছে বুলি জানিব পৰা গৈছে । তথ্য অনুসৰি, নিহত লোকজন নাজিৰাৰ আলী হুছেইন ৷ আনহাতে, আহত দুজন ক্ৰমে ৰিজুৱাৰ হুছেইন আৰু জিয়াউৰ হুছেইন বুলি জানিব পৰা গৈছে ৷

বিৱৰণ অনুসৰি, গোলাঘাট জিলাৰ নুমলীগড়ত এখন ট্ৰাকে মহতিয়াই নিলে এখন মাৰুটি ৱেগনাৰ বাহনক । ফলত ৱেগনাৰ বাহনখনত থকা নাজিৰাৰ আলী হুছেইন নামৰ লোকজন নিহত হোৱাৰ লগতে ৰিজুৱাৰ আৰু জিয়াউৰ আহত হোৱাৰ তথ্য লাভ কৰা হৈছে ৷ ইফালে এই দুৰ্ঘটনা সংঘটিত কৰাৰ পাচতেই ঘটনাস্থলীৰ পৰা ট্ৰাকসহ পলায়ন কৰে ট্ৰাক চালকজন ৷

এই ঘটনা সংঘটিত হোৱাৰ পাচতে অঞ্চলটোত সৃষ্টি হয় এক হুলস্থূলীয়া পৰিৱেশৰ ৷ ঘটনাস্থলীত আৰক্ষী উপস্থিত হৈ স্থানীয় লোকৰ সহযোগত আহত দুজনক নুমলীগড়স্থিত বিবেকানন্দ চিকিৎসালয়লৈ প্ৰেৰণ কৰে ৷ অৱশ্যে পৰৱৰ্তী সময়ত আহত দুয়োকে উন্নত চিকিৎসাৰ বাবে চিকিৎসকে যোৰহাট চিকিৎসা মহাবিদ্যালয়লৈ প্ৰেৰণ কৰে ।

লগতে পঢ়ক : অৰুণাচলত অসমৰ কিশোৰীৰ মৃত্যুক কেন্দ্ৰ কৰি উত্তপ্ত বৰডুমচা