Robbery Incident: কাকপথাৰ-ডুমডুমা পথত চলন্ত গাড়ীত কণী মাৰি ডকাইতিকাণ্ড

তিনিচুকীয়া, ২৩ জুলাই: তিনিচুকীয়া জিলাত দিন ডকাইতিৰ ঘটনা সংঘটিত হৈছে ৷ চিনেমাৰ কায়দাৰে চলন্ত গাড়ীত কণী মাৰি তিনিচুকীয়া জিলাৰ ডুমডুমা-কাকপথাৰ ৰঙাজান বাইপাছত সংঘটিত কৰে ডকাইতি কাণ্ড ৷ তিনিজনীয়া ডকাইতৰ দলটোৱে লুটি নিয়ে নগদ ধনসহ এটা মোবাইল ফোন ৷

ঘটনা অনুসৰি, কাকপথাৰৰ পৱন ডেকা নামৰ যুৱকজনে ডিগবৈৰ পৰা কাকপথাৰ দিশে আহি থকা অৱস্থাত সংঘটিত হয় এই ডকাইতিৰ ঘটনাটো ৷ ডকাইতৰ দলটোৱে যুৱকজনক চোকা অস্ত্ৰৰে আক্ৰমণ কৰি আহত কৰাৰ লগতে পেটত মাৰণাস্ত্ৰ লগাই দিয়ে বুলি সদৰী কৰে ভুক্তভোগী ডেকাই ৷ 

এখন নম্বৰ প্লেট বিহীন পালচাৰ মটৰ চাইকেলত অহা এটা তিনিজনীয়া ডকাইতৰ দলে সংঘটিত কৰে এই ঘটনাটো ৷ দলটোৱে গাড়ীখনক পিচফালৰ পৰা অনুসৰণ কৰি আহি অভাৰটেক কৰি কণী নিক্ষেপ কৰি ৰখাই গাড়ীখন ৷ ঘটনাটোত AS06 J1542 নম্বৰৰ ভুক্তভোগীৰ গাড়ীখনো কিছু পৰিমাণে নষ্ট হয় ৷  

পৰৱৰ্তী সময়ত ভুক্তভোগী পৱন ডেকাই ডুমডুমা আৰক্ষী থানাত উপস্থিত হৈ ঘটনাৰ সন্দৰ্ভত এজাহাৰ দাখিল কৰে ৷ ইয়াৰ পিচতে ঘটনাস্থলীত ডুমডুমা-কাকপথাৰ আৰক্ষীয়ে উপস্থিত হৈ তদন্ত আৰম্ভ কৰিছে ৷ 

লগতে পঢ়ক: Brutal murder case: ড্ৰাগছ আসক্ত পুত্ৰই হত্যা কৰিলে পিতৃক