জোনাইত পথ দুৰ্ঘটনাত আহত তিনি

ধেমাজি জিলাৰ জোনাইৰ ৫১৫ নং ঘাইপথৰ কুলি তিনিআলিত সংঘটিত হয় এক পথ দুৰ্ঘটনা (Road accident in Jonai)। দুৰ্ঘটনাগ্ৰস্ত বাহনখনত থকা তিনিজন লোক আহত হয় । ইয়াৰে দুজনৰ অৱস্থা সংকটজনক বুলি জানিব পৰা গৈছে ৷ সোমবাৰে দিনৰ ২.৩০ বজাত চিলাপথাৰ দিশৰ পৰা জোনাই অভিমুখি AS07 BC 4630 নম্বৰৰ এখন বলেৰ' পিকআপ বাহনে যান্ত্ৰিক বিজুতিৰ বাবে নিয়ন্ত্ৰণ হেৰুৱাই ৫১৫ নং ৰাষ্ট্ৰীয় ঘাইপথৰ কুলি তিনিআলিৰ সোঁ মাজত বাগৰি পৰে । ফলত বাহনখনৰ সন্মুখভাগ ভাঙি যায় । জানিব পৰা মতে, বাহনখনত জোনাই কৃষি বিভাগৰ সাৰ কঢ়িয়াই আনিছিল । পিছত জোনাই আৰক্ষীয়ে ঘটনাস্থলীত উপস্থিত হৈ আহত লোককেইজনক উদ্ধাৰ কৰি জোনাই অসামৰিক চিকিৎসালয়ত ভৰ্তি কৰায় । ইয়াৰ পাছতেই আহত কেইজনক চিকিৎসকে উন্নত চিকিৎসা বাবে ধেমাজি অসামৰিক চিকিৎসালয়লৈ(Dhemaji Civil Hospital) প্ৰেৰণ কৰে ৷