Dacoits arrested: কিছু পৰিমাণে কমিল ৰঙিয়া আৰক্ষীৰ মূৰৰ কামোৰণি

ৰঙিয়া, 28 অক্টোবৰ : ৰঙিয়া আৰক্ষীৰ মূৰৰ কামোৰণি হৈ পৰা পাঁচ দুৰ্ধৰ্ষ ডকাইত অৱশেষত আৰক্ষীৰ জালত পৰিল । ৰঙিয়া থানাৰ ভাৰপ্ৰাপ্ত আৰক্ষী বিষয়াৰ নেতৃত্বত যোৱা দলটোৱে এক গোপন সূত্ৰৰ পম খেদি অভিযান চলাই নলবাৰী জিলাৰ ঘগ্ৰাপাৰৰ পৰা পাঁচটাকৈ দুৰ্ধৰ্ষ ডকাইতক গ্ৰেপ্তাৰ কৰে । ধৃত ডকাইতকেইটা হৈছে পাটাছাৰকুছিৰ বটোৱাৰ ৰেজ্জাক আলী, ৰফিকুৰ ৰহমান, নলবাৰীৰ ঘগ্ৰাপাৰৰ পূৱ বৰচিৰালৰ দাইথুন বড়ো, দুফাং বড়ো আৰু ঘগ্ৰাপাৰৰ নমাটিৰ শ্বপন বড়ো ।

ধৃত ডকাইতকেইটাৰ পৰা আৰক্ষীয়ে নগদ ১ লাখ ৬ হাজাৰ সাতশ টকাসহ কিছু পৰিমাণৰ সোণালী ৰঙৰ গহণা জব্দ কৰিবলৈ সক্ষম হয় ।‌ উল্লেখ্য যে, ডকাইতকেইটাৰ বিৰুদ্ধে এটিএম কাটি ডকাইতি কৰা, মানুহৰ ঘৰত ডকাইতি কৰাৰ লগতে বিভিন্ন ধৰণৰ চুৰি-ডকাইতিত জড়িত থকাৰ অভিযোগ আছে । ৰঙিয়া আৰক্ষীয়ে ৰঙিয়া থানাত গোচৰ নং 574/23 U/S 457/380 IPC ৰ অধীনত এক গোচৰ ৰুজু কৰে । প্ৰাপ্ত খবৰ অনুসৰি, আৰক্ষীয়ে দাইথুন বড়ো, দুফাং বড়োক প্ৰথমে গ্ৰেপ্তাৰ কৰে, তাৰ পিচত দুই দুৰ্ধৰ্ষ ডকাইতৰ স্বীকাৰোক্তিৰ ভিত্তিত আন তিনিটা ডকাইতকো গ্ৰেপ্তাৰ কৰিবলৈ সক্ষম হয় । বৰ্তমান ৰঙিয়া আৰক্ষীয়ে ধৃত ডকাইতকেইটাক অধিক তথ্যৰ বাবে সোধ-পোচ অব্যাহত ৰাখিছে ৰঙিয়া থানাত ।

লগতে পঢ়ক : Dacoits Detained : আৰক্ষীৰ জালত ৬ টাকৈ দুধৰ্ষ ডকাইত