Murder in Nagaon : পুত্ৰৰ হাতত প্ৰাণ গ’ল মাতৃৰ

নগাঁও, 10 জুলাই :  নগাঁৱৰ ৰূপহীহাটত সংঘটিত হৈছে এক চাঞ্চল্যকৰ ঘটনা । পুত্ৰই নিজ মাতৃক মৰিয়াই মৰিয়াই হত্যা কৰা ঘটনাই সমগ্ৰ অঞ্চলতে সৃষ্টি কৰিছে তীব্ৰ চাঞ্চল্যৰ । এই ঘটনা সংঘটিত হৈছে জিলাখনৰ ৰূপহীহাটৰ বৰপকা অঞ্চলত । 

ঘটনা সন্দৰ্ভত জানিবলৈ পোৱা অনুসৰি বৰপকা অঞ্চলৰ জিয়াবুৰ ৰহমানৰ ঘৰত দীৰ্ঘদিনৰ পৰাই চলি আহিছিল পাৰিবাৰিক কন্দল । দেওবাৰে নিশাও জিয়াবুৰৰ ঘৰত সৃষ্টি হৈছিল সংঘাতৰ । পাৰিবাৰিক সংঘাতে পৰৱৰ্তী সময়ত লৈছিল ভয়ংকৰ ৰূপ । জিয়াবুৰ ৰহমানে বেয়াকৈ প্ৰহাৰ কৰে নিজ মাতৃক । পুত্ৰই কৰা আক্ৰমণৰ ফলতেই মৃত্যু হয় মাতৃ সুৰুজ বানুৰ । বাঁহেৰে মৰিয়াই মৰিয়াই নিজ মাতৃক হত্যা কৰি ঘৰৰ পৰা পলায়ন কৰাৰ অভিযোগ জিয়াবুৰ ৰহমানৰ বিৰুদ্ধে । 

বিভিন্ন নিচাজাতীয় সামগ্ৰী সেৱন কৰাৰ অভিযোগ উত্থাপন হৈছে অভিযুক্ত জিয়াবুৰ ৰহমানৰ বিৰুদ্ধে । নিশাই ঘটনাস্থলীত ৰূপহীহাট আৰক্ষী উপস্থিত হৈ ঘটনাৰ তদন্ত আৰম্ভ কৰে । অৱশ্যে এই পৰ্যন্ত মাতৃ হত্যাৰ অভিযুক্ত জিয়াবুৰ ৰহমানক আটক কৰিবলৈ সক্ষম হোৱা নাই আৰক্ষী ।

লগতে পঢ়ক : Constituency delimitation 2023 : চিচিবৰগাঁও বিধানসভা সমষ্টি সংৰক্ষণমুক্ত ৰখাৰ দাবীত সংবাদমেল