লোকসভাত অগপৰ প্ৰাৰ্থিত্বক লৈ এতিয়াও অনিশ্চয়তাত অগপ নেতৃত্ব !

গুৱাহাটী, 16 ডিচেম্বৰ : সমাগত লোকসভা নিৰ্বাচনত আসনক লৈ এতিয়াও নিশ্চিত নহয় অগপৰ নেতৃত্ব ৷ লোকসভা নিৰ্বাচনত অসম গণ পৰিষদ দলৰ প্ৰাৰ্থী থিয় কৰাটো নিশ্চিত বুলি অগপৰ সভাপতি অতুল বৰাই প্ৰায়ে আওঁৰাই থাকে যদিও লোকসভা নিৰ্বাচনত বিজেপি দলে মিত্ৰদল অগপক লোকসভাত আসন এৰি দিব নে নাই তাকে লৈ এতিয়াও অনিশ্চয়তাত আছে দলটোৰ নেতৃত্ব ৷

শনিবাৰে অগপৰ আমবাৰী কাৰ্যালয়ত অনুষ্ঠিত এখন সভাত অংশগ্ৰহণ কৰিবলৈ আহি সাংবাদিকৰ প্ৰশ্নত দলটোৰ কাৰ্যকৰী সভাপতি তথা ৰাজ্য চৰকাৰৰ মন্ত্ৰী কেশৱ মহন্তৰ কথাত এই কথাই প্ৰতিফলিত হৈছে ৷ তেওঁ একেআষাৰে ক'ব পৰা নাই যে অগপ দলে লোকসভাত প্ৰাৰ্থিত্ব দিব ৷  

মন্ত্ৰী কেশৱ মহন্তই কয় যে, এতিয়াও বিজেপিৰ লগত মিত্ৰতাত আছে অগপ ৷ নিৰ্বাচনত বিজেপিৰ লগত মিত্ৰতাৰে অৱতীৰ্ণ হ’ব অগপ ৷ 12 টা লোকসভা সমষ্টিত বিজেপি মিত্ৰজোঁট জয়ী হোৱাটো নিশ্চিত ৷  

তেওঁ কয় যে, আসনক লৈ এতিয়াও আলোচনা হোৱা নাই ৷ অগপই কোন‌ সমষ্টিত নিৰ্বাচন খেলিব সেয়া এতিয়াই প্ৰকাশ কৰিব নোৱাৰো বুলি কয় তেওঁ ৷ নিৰ্দিষ্ট সময়ক এই বিষয়ে আলোচনা হোৱাৰ‌ পিছতহে ক’ব পৰা যাব বুলি মন্তব্য কৰে মন্ত্ৰী কেশৱ মহন্তই ৷ লগতে অগপৰ কাৰ্যকৰী সভাপতিগৰাকীয়ে কয় " এইবাৰ সমষ্টি প্ৰায় বিলাকেই ভাল, গতিকে য’তেই খেলে তাতেই অগপ জয়ী হ’ব ৷"  

ইফালে আগন্তুক লোকসভা নিৰ্বাচনত অসমত মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বত বিজেপি মিত্ৰজোঁট ভালকৈয়ে জিকিব বুলিও মন্তব্য কৰে মন্ত্ৰী কেশৱ মহন্তই ৷ 

লগতে পঢ়ক : মিছন বসুন্ধৰা ২.০ : ভূমিৰ অধিকাৰৰ পৰা বঞ্চিত ৰাজ্যৰ লাখ লাখ খিলঞ্জীয়া