মাজুলীত ভয়ংকৰ অগ্নিকাণ্ড, চকুৰ পচাৰতে জ্বলি ছাই হ’ল গেলামালৰ দোকান

মাজুলী, 29 নৱেম্বৰ : ৰাসৰ আনন্দ উল্লাহৰ মাজতে মাজুলীত বিধ্বংসী অগ্নিকাণ্ড । উজনী মাজুলীৰ জেংৰাইমুখ থানাৰ অন্তৰ্গত চিৰাম তেলিয়াবাৰী গাৱঁৰ জীৱন বৰা নামৰ ব্যক্তিজনৰ ব্যৱসায়িক প্ৰতিষ্ঠানত মঙলবাৰে নিশা ভয়ংকৰ অগ্নিকাণ্ডৰ ঘটনা সংঘটিত হয় ৷ অগ্নিকাণ্ডৰ ফলত গেলামালৰ দোকানখন সম্পূৰ্ণৰূপে ভস্মীভূত হয়।

অগ্নিকাণ্ড সংঘটিত হোৱাৰ পিচতেই দোকানখনৰ গৰাকীয়ে অগ্নিনিৰ্বাপক বাহিনীক খবৰ দিছিল যদিও সময়মতে উপস্থিত নহ’ল অগ্নিনিৰ্বাপক বাহিনীৰ বাহন ৷ ঘটনাৰ বহু পলমকৈ অগ্নিনিৰ্বাপক বাহিনীৰ গাড়ী উপস্থিত হোৱাৰ অভিযোগ তুলিছে স্থানীয় লোকে। ঘটনাস্থলীত জেংৰাইমুখ থানাৰ আৰক্ষী, ফুলনি আৰক্ষী উপস্থিত হোৱাৰ বহু পিচত উপস্থিত হয় অগ্নিনিৰ্বাপক বাহিনীৰ বাহন । 

এই জুইত জাহ যায় প্ৰায় 20 লাখ টকাৰ সামগ্ৰীৰ লগতে বহু পৰিমানৰ নগদ ধন ৷ অৱশ্যে অগ্নিৰ সূত্ৰপাত কিয় হ’ল সেয়া এতিয়াও জানিব পৰা নাই ৷

লগতে পঢ়ক: ভূমি জালিয়াতি গোচৰত ৬ জনক গ্ৰেপ্তাৰ