HSLC Exam 2023: ছেবাৰ গাফিলতি; পুনৰীক্ষণত দশম স্থানত উজলিল নলবাৰীৰ পূব কালাকুছিৰ জেচিকা মেছবিন

নলবাৰী, 29 জুন: ছেবাই হাইস্কুল শিক্ষান্ত পৰীক্ষাৰ ফলাফল ঘোষণা কৰাৰ প্ৰায় এমাহ পাৰ হ’ল ৷ এইবাৰো কোনো বিসংগতি নোহোৱাকৈ ফলাফল ঘোষণা কৰিব নোৱাৰিলে ছেবাই ৷ পূৰ্বৰ দৰেই এইবাৰো বিসংগতিয়ে লগ নেৰিলে ছেবাক ৷ নলবাৰীৰ এগৰাকী ছাত্ৰীৰ পৰীক্ষাৰ উত্তৰ বহী পুনৰীক্ষণৰ পাছতে ধৰা পৰে এই বিসংগতি ৷

বহী পুনৰীক্ষণত উজলিল নলবাৰীৰ মৰোৱাৰী শংকৰদেৱ শিশু বিদ্যা নিকেতনৰ ছাত্ৰী জেচিকা মেছবিন ৷ পুনৰীক্ষণত মেধাৱী ছাত্ৰী জেচিকা মেছবিনে লাভ কৰিলে ৰাজ্যৰ ভিতৰতে 10 নং স্থান ৷ জেচিকাই মুঠ নম্বৰ লাভ কৰিছিল 583 ৷ কিন্ত পৰৱৰ্তী সময়ত বহী পুনৰীক্ষণৰ বাবে আবেদন জনোৱাত মুঠ ৫৮৫ নম্বৰেৰে শীৰ্ষ দশম স্থান দখল কৰিবলৈ সক্ষম হয় জেচিকা মেছবিনে ৷ নলবাৰীৰ পূব কালাকুছি গাঁৱৰ আফতাৰ হুছেইন আৰু চুলতানা ৰৌচানাৰা বেগমৰ কন্যা জেচিকা মেছবিনৰ সাফল্যত এতিয়া আনন্দিত বিদ্যালয়ৰ লগতে পৰিয়াল তথা গাঁওবাসী ৷  

ছাত্ৰীগৰাকীয়ে কয় যে, পূৰ্বে কোনো বিসংগতিৰ বাবে আশা ধৰণে ফলাফলৰ পৰা বঞ্চিত হৈছিলো ৷ স্থান লাভ কৰিম বুলি মনত আত্মবিশ্বাস আছিল ৷ সেয়ে পৰৱৰ্তী সময়ত বহী পুনৰীক্ষণৰ বাবে আবেদন জনোৱাত স্থান লাভ কৰিবলৈ সক্ষম হলো বুলি জনায় ছাত্ৰীগৰাকীয়ে ৷

লগতে পঢ়ক: Eid ul Adha 2023: ৰাজ্যজুৰি উলহ-মালহেৰে উদযাপন পবিত্ৰ ঈদ-উল-আজহা