নিশা লখিমপুৰৰ বাইপাছত দাউ দাউকৈ জ্বলি উঠিল এম্বুলেন্স

লখিমপুৰ, 11 ডিচেম্বৰ : লখিমপুৰৰ বাইপাছত দেওবাৰে নিশা দাউ দাউকৈ জ্বলি উঠিল এখন এম্বুলেন্স ৷ লখিমপুৰৰ বাইপাছৰ সমীপৰ বৃন্দাবন হোটেলৰ সমীপত ৰখাই থোৱা অৱস্থাতে গহপুৰ চিকিৎসালয়ৰ এখন এম্বুলেন্স হঠাৎ জ্বলি উঠে ৷ এ এছ ০১ এফ চি ৮৩৩৪ নম্বৰৰ এম্বুলেন্সখন জ্বলি ভস্মীভূত হয় ৷ উল্লেখ্য যে, এম্বুলেন্সখন ৰখাই চালকজনে চাহ খাবলৈ হোটেলত সোমোই যোৱাৰ সময়তে এই জুইৰ সূত্ৰপাত হয় ৷

যান্ত্ৰিক বিজুতিৰ বাবে জুইৰ সূত্ৰপাত হোৱাৰ বুলি সন্দেহ প্ৰকাশ কৰা হৈছে ৷ ঘটনা অনুসৰি, লখিমপুৰ চিকিৎসা মহাবিদ্যালয়ত ৰোগী থৈ ওভতাৰ পথত এই ঘটনা সংঘটিত হয় ৷ পৰৱৰ্তী সময়ত এছ ডি আৰ এফ বাহিনীৰ লোক ঘটনাস্থলীত উপস্থিত হৈ জুই নিৰ্বাপন কৰিবলৈ সক্ষম হয় ৷

লগতে পঢ়ক : ভাৰতীয় জীৱন বীমা অভিকৰ্তা সন্থাৰ যোৰহাট মাণ্ডলিক পৰিষদৰ দ্বি-বাৰ্ষিক অধিৱেশনৰ সামৰণি