Dead body recovered: মাকুম ছোটা হাপজানৰ ২৫ নং চাহ বাগিচাত এজন ব্যক্তিৰ মৃতদেহ উদ্ধাৰ

তিনিচুকীয়া, ৯ ছেপ্টেম্বৰ : মাকুম ছোট’ হাপজানৰ ২৫ নং চাহ বাগিচাত এক সন্দেহজনক হত্যাকাণ্ডৰ ঘটনা সংঘটিত হৈছে । অতি নিৰ্মমভাৱে হত্যা কৰি মুখমণ্ডলত কাপোৰেৰে বান্ধি পলিথিনেৰে মেৰিয়াই থোৱা অৱস্থাত উদ্ধাৰ হয় এটা মৃতদেহ ৷ তাকে লৈ সমগ্ৰ অঞ্চলটোত তীব্ৰ চাঞ্চল্যই বিৰাজ কৰিছে ।

এগৰাকী স্থানীয় লোকৰ ভাষ্য অনুসৰি মৃতদেহটো প্ৰায় ৪২ বছৰীয়া বীৰেন্দ্ৰ সিঙ নামৰ এজন লোকৰ আৰু লোকজনক প্ৰকৃততে বিহাৰৰ বুলি জানিব পৰা গৈছে । লোকজন মাকুমৰ বৰপথাৰৰ চামু গুৱালা নামৰ ব্যক্তিজনৰ ঘৰত ভাড়াতীয়া হিচাপে আছিল । আজি তিনিদিন ধৰি লোকজন নিৰুদ্দেশ হৈ আছিল ।

শনিবাৰে পুৱাই বাগিচাত কৰ্মৰত শ্ৰমিকে পলিথিনেৰে বান্ধি থোৱা অৱস্থাত মৃতদেহটো প্ৰত্যক্ষ কৰি স্থানীয় মাকুম আৰক্ষীলৈ খবৰ দিয়ে । পৰৱৰ্তী সময়ত ঘটনাস্থলীত মাকুম আৰক্ষীৰ দল উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে তিনিচুকীয়া অসামৰিক চিকিৎসালয়লৈ প্ৰেৰণ কৰাৰ লগতে ঘটনাৰ তদন্ত আৰম্ভ কৰিছে । পৰৱৰ্তী সময়ত আৰক্ষীৰ তদন্তত পোহৰলৈ আহিব বীৰেন্দ্ৰ সিঙক কোনে হত্যা কৰি এনেদৰে পেলাই থৈ গৈছিল ।

লগতে পঢ়ক : Dead body recovered: পুনৰ মৃতদেহ উদ্ধাৰ, বৰশীত লাগিল অচিনাক্ত মৃতদেহ