Drugs peddlers detained at Manikpur : গেৰুকাবাৰী আৰক্ষীৰ অভিযানত ড্ৰাগছসহ আটক সৰবৰাহকাৰী

মাণিকপুৰ, 2 ছেপ্টেম্বৰ : বঙাইগাঁও জিলাৰ মাণিকপুৰ আৰক্ষীয়ে অব্যাহত ৰাখিছে ড্ৰাগছ বিৰোধী অভিযান । ড্ৰাগছৰ বিৰুদ্ধে অভিযান চলাই গেৰুকাবাৰী আৰক্ষীয়ে শনিবাৰে পুৱতি নিশা বঙাইগাঁও জিলাৰ 27 নং ৰাষ্ট্ৰীয় ঘাইপথৰ গেৰুকাবাৰী চ’কত বুজন পৰিমাণৰ ড্ৰাগছসহ গ্ৰেপ্তাৰ কৰে দুটা সৰবৰাহকাৰীক ।

নাগালেণ্ডৰ ডিমাপুৰৰ পৰা নাইট ছুপাৰেৰে গেৰুকাবাৰীত কোনো লোকক হস্তান্তৰ কৰিব আহি আৰক্ষীৰ জালত পৰে সৰবৰাহকাৰী দুটা । ধৃত সৰবৰাহকাৰী দুটা অহেদুল ইছলাম (27) আৰু সজল নমঃসুদ্ৰ (38) বুলি জানিব পৰা গৈছে । ইয়াৰে আহেদুলৰ ঘৰ নগাঁও আৰু সজলৰ ঘৰ কৰিমগঞ্জ জিলাত ।

গোপন খবৰৰ ভিত্তিত গেৰুকাবাৰী তহলদাৰী আৰক্ষী চকীৰ ভাৰপ্ৰাপ্ত বিষয়া বিনয় মালাকাৰৰ নেতৃত্বত আৰক্ষীৰ এটা দলে চলোৱা অভিযানটোত আটক কৰা হয় সৰবৰাহকাৰী কেইটা ৷ ধৃত সৰবৰাহকাৰী দুটাৰ পৰা পাঁচটা চাবোনৰ বাকচত পাঁচ পেকেট ড্ৰাগছ আৰু এটা ম’বাইল ফোন জব্দ কৰে আৰক্ষীয়ে ।

জব্দকৃত ড্ৰাগছৰ ওজন 64 গ্ৰাম । জব্দকৃত ড্ৰাগছখিনিৰ বজাৰ মূল্য দুই লক্ষাধিক টকা বুলি আৰক্ষীয়ে প্ৰকাশ কৰিছে । আৰক্ষীয়ে সৰবৰাহকাৰী দুটাক গেৰুকাবাৰী তহলদাৰী আৰক্ষী চকীলৈ আনি তদন্ত অব্যাহত ৰাখিছে ।

লগতে পঢ়ক : Heroin seized: কাছাৰ আৰক্ষীৰ অভিযানত বুজন পৰিমানৰ হেৰ’ইনসহ মহিলা গ্ৰেপ্তাৰ