Minor girl rape: একে গাঁৱৰে পিতা-পুত্ৰ কামনাৰ বলি হ’ল ১৩ বছৰীয়া কিশোৰী

বঙাইগাঁও, 22 ছেপ্টেম্বৰ : বঙাইগাওঁ জিলাৰ নৰ্থ বইটামাৰিত জঘন্য ঘটনা সংঘটিত হৈছে ৷ পিতা আৰু পুত্ৰৰ কামনাৰ বলি হ’ল এগৰাকী 13 বছৰীয়া কিশোৰী ৷ ধনৰ প্ৰলোভন দি একে গাঁৱৰে পিতা আৰু পুত্ৰই কিশোৰীগৰাকীক 5 বাৰ কৈ ধৰ্ষণ কৰিছে বুলি পোহৰলৈ আহিছে ৷ ইতিমধ্যে ঘটনা সন্দৰ্ভত স্থানীয় লোকৰ লগতে পৰিয়ালৰ লোকে এজাহাৰ দাখিল কৰিছে ৷ 

জানিব পৰা মতে কিশোৰীগৰাকীৰ মাতৃ ঘৰত নাথাকিলে পিতা-পুত্ৰই সুযোগ লৈ কেইবাবাৰো কিশোৰীগৰাকীৰ লগত অপকৰ্ম কৰি আহিছিল ৷ কিন্তু এই কথা ঘৰৰ কাৰোবাক ক’লে কিশোৰীগৰাকীৰ ভগ্নীক হত্যা কৰিব বুলি ধমকি দিছিল ৷ সেই ভয়তে কিশোৰীগৰাকীয়ে এই কথা কাকো প্ৰকাশ কৰা নাছিল ৷ কিন্তু শুকুৰবাৰে কিশোৰীগৰাকীৰ বেগত মাতৃয়ে 50 টকা এটা পোৱাত ক’ত পালে বুলি সোধোতে সমগ্ৰ ঘটনা পোহৰলৈ আহে ৷ কিশোৰীগৰাকী অষ্টম শ্ৰেণীৰ ছাত্ৰী বুলি জানিব পৰা গৈছে ৷ 
এই জঘন্য ঘটনা সংঘটিত কৰা পিতৃৰ নাম হৰি বৈষ্ণৱ (70) পুত্ৰৰ নাম বিৰাজ বৈষ্ণৱ (23) ৷ বিৰাজ বৈষ্ণৱ এটা ৱেব পৰ্টেলৰ সাংবাদিক বুলি জানিবলৈ দিয়ে গাঁৱৰ ৰাইজে ৷ এই ঘটনা পোহৰলৈ অহাৰ পিচতে বৰ্তমান বিৰাজ বৈষ্ণৱ পলাতক অৱস্থাত আছে যদিও আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে ৷ ইতিমধ্যে আৰক্ষীয়ে বিৰাজৰ পিতৃক আটক কৰিছে ৷

লগতে পঢ়ক: Sexual harassment in Nagaon: চিকিৎসাৰ গইনা লৈ গৰ্ভৱতী মহিলাক যৌন আতিশয্য চলোৱাৰ অভিযোগ