বৰপেটা সত্ৰত আজি দৌল মহোৎসৱৰ সুঁৱেৰী

বৰপেটা সত্ৰত ১৬ মাৰ্চৰ পৰা সত্ৰীয়া ৰীতি আৰু পৰম্পৰাৰে চাৰিদিনীয়াকৈ আৰম্ভ হোৱা দৌল মহোৎসৱ (Deul Mahotshav at Barpeta Satra) আজি অৰ্থাৎ শনিবাৰে সামৰণি পৰিব ৷ দৌল মহোৎসৱৰ অন্তিমদিনা বৰপেটা সত্ৰত পালন কৰা হৈছে সুঁৱেৰী উৎসৱ ৷ আবিৰৰ ৰঙত ইতিমধ্যে একাকাৰ হৈ পৰিছে সত্ৰনগৰী বৰপেটা ৷ আকাশ-বতাহ মুখৰিত কৰিছে মন প্ৰাণ উতলা কৰা হোলীগীতৰ সুৰে ৷ বৰপেটাৰ প্ৰাণৰ-মনৰ-ৰঙৰ উৎসৱৰ আনন্দ-উল্লাসত মতলীয়া হৈ পৰা প্ৰতিজনৰ কণ্ঠৰ পৰা নিগৰিছে হোলী গীতৰ অমিয়া সুৰ ৷ আবিৰৰ ৰং, কৃষ্ণপ্ৰেম আৰু প্ৰকৃতি বন্দনাৰে মুখৰিত হোলীগীতৰ সুৰত বৈকুণ্ঠপুৰীলৈ পৰিণত হৈ পৰে সত্ৰনগৰী বৰপেটা ৷