এলঝাইমাৰ ৰোগ হ'ল মস্তিষ্কত হোৱা এবিধ বিশেষ ধৰণৰ ৰোগ ৷ এই ৰোগক আক্রান্ত হলে মস্তিষ্কৰ স্নায়কোষসমূহ ধ্বংস হ'বলৈ আৰম্ভ কৰে ৷ ধ্বংসহোৱা স্নায়ুকোষসমূহৰ বাবেই স্মৃতিশক্তি লোপ পাবলৈ ধৰে ৷
সাধাৰণতে এই ৰোগ ৬০ৰ উৰ্দ্ধৰ লোকৰ বেছি হোৱা দেখা যায় ৷ অৱশ্যে এই ক্ষেত্ৰত কমবয়সীয়া লোক আক্রান্ত নহয় বুলি নিশ্চয়কৈ ক'ব নোৱাৰি ৷ চিকিৎসা বিজ্ঞানত স্মৃতিভ্ৰমক ডিমেনছিয়া বুলি কোৱা হয় ৷ ডিমেনছিয়াৰ অন্যতম কাৰণ এলঝাইমাৰ ৰোগ ৷ সমগ্র বিশ্বতে ২১.৭ শতাংশ লোক এলঝাইমাৰ ৰোগত আক্রান্ত হয় ৷ ১৯০৭ চনত জাৰ্মানীৰ বিখ্যাত স্নায়ুৰোগ বিশেষজ্ঞ ডাঃ এলয়েছ এলঝাইমাৰে প্ৰথমবাৰৰ বাবে স্মৃতিভ্ৰমৰ কাৰণ সম্পৰ্কে বাখ্যা কৰিছিল ৷
পুৰুষ-মহিলা উভয়ে এই ৰোগত ভুগিবলৈ ধৰিছে ৷ সাধাৰণতে ৬৫ৰ উৰ্দ্ধৰ প্ৰতি ১৫ গৰাকী লোকৰ ভিতৰত এগৰাকীৰ এই ৰোগ হোৱা দেখা যায় ৷
এলঝাইমাৰ ৰোগৰ লক্ষণসমূহ কি কি ?
১) এই ৰোগে স্মৃতিশক্তি হ্ৰাস কৰে, যাৰ বাবে মানুহে একো মনত ৰাখিব নোৱাৰে ৷
২) দৈনন্দিন কাম-কাজ পৰিচালনাত অসুবিধাৰ সন্মুখীন হয় ৷
৩) এনে ৰোগত আক্রান্ত ব্যক্তিৰ উদ্যমৰ অভাৱ পৰিলক্ষিত হয় ৷ কাম-বন কৰিবলৈ ইচ্ছা নকৰে ৷
৪) শেহতীয়াকৈ ঘটি যোৱা ঘটনাৰাজি মনত পেলাবলৈ কষ্ট হয় ৷
৫) এলঝাইমাৰ ৰোগত আক্ৰান্ত ব্যক্তিৰ ব্যৱহাৰৰ ক্ষেত্ৰত অস্বাভাৱিক পৰিবৰ্তন হ'বলৈ ধৰে ৷ কোনো কাৰণ নোহোৱাকৈ গালি-গালাজ কৰা, উত্তেজিত হোৱা, মাৰপিট কৰা আদি দেখা যায় ৷
৬) ভাষাৰ ক্ষেত্ৰতো সমস্যাৰ সৃষ্টি হয় ৷ কথোপকথনৰ সময়ত সঠিক শব্দৰ প্ৰয়োগ কৰিব নোৱাৰে ৷
৭) সময় আৰু স্থান সম্পৰ্কে বিভ্ৰান্ত হয় ৷ ৰোগীগৰাকী ক'ত আছে, কিমান সময় বহি অথবা থিয় হৈ আছে সেয়া অনুভৱ কৰিব নোৱাৰে ৷
৮) বিচাৰ বুদ্ধিৰ ক্ষেত্ৰতো বিভিন্ন ধৰণৰ সমস্যাৰ উদ্ভৱ হয় ৷
৯) এলঝাইমাৰ ৰোগত আক্ৰান্ত ব্যক্তিৰ বুদ্ধি প্ৰয়োগ ক্ষমতা একেবাৰে হ্ৰাস পায় ৷ পঢ়া-শুনা কৰা বা হিচাপ পত্ৰ ৰখা আদি সাধাৰণ কামখিনিত সম্পাদন কৰিব নোৱাৰে ৷
১০) কোনো এটা বস্তু কত ৰাখিছে মনত নাথাকে ৷ বস্তুবোৰ হেৰুৱাই পেলায় আৰু পৰৱৰ্তী সময়ত সেই বস্তুসমূহ বিচাৰি হাই -কাজিয়া আৰম্ভ কৰি দিয়ে ৷
