প্ৰয়াগৰাজ : ত্ৰিবেণী সংগমত চলি থকা মহাকুম্ভ মেলা বিশ্বৰ অন্যতম বৃহৎ ধৰ্মীয় সমাবেশৰ সাক্ষী হৈ পৰিছে । আনহাতে, ইয়াত কোটি কোটি ভক্তৰ অংশগ্ৰহণৰ বাবে সমগ্ৰ বিশ্বৰ দৃষ্টি আকৰ্ষণ কৰিছে । এই প্ৰাচীন আৰু মহান অনুষ্ঠানটোৰ আধ্যাত্মিক তাৎপৰ্য অনুভৱ কৰি ভক্তসকলে ত্ৰিবেণী সংগমত পবিত্ৰ স্নান কৰিবলৈ মহাকুম্ভ মেলা ক্ষেত্ৰলৈ ঢপলিয়াই আহিছে । জানিব পৰা মতে এই বৰ্ষৰ মহাকুম্ভত প্ৰায় ৪১০ নিযুত ভক্তই পবিত্ৰ স্নান কৰিছে ।
আনহাতে, শনিবাৰে মধ্যপ্ৰদেশৰ মুখ্যমন্ত্ৰী মোহন যাদৱে ৰাজস্থানৰ মুখ্যমন্ত্ৰী ভজনলাল শৰ্মাৰ সৈতে প্ৰয়াগৰাজৰ ত্ৰিবেণী সংগমত একেলগে পবিত্ৰ স্নান কৰে । মুখ্যমন্ত্ৰী যাদৱ আৰু ৰাজস্থানৰ মুখ্যমন্ত্ৰী শৰ্মাই ত্ৰিবেণী সংগমত একেলগে পবিত্ৰ স্নান কৰাৰ পিছত ইজনে সিজনক শুভেচ্ছা জনায় ।
উল্লেখ্য যে, ত্ৰিবেণী সংগম হৈছে প্ৰয়াগৰাজৰ গংগা, যমুনা আৰু পৌৰাণিক সৰস্বতী নদীৰ সংগমস্থল । ইফালে পবিত্ৰ স্নানৰ পিছত মুখ্যমন্ত্ৰী মোহন যাদৱে ANI ৰ আগত কয়, "সংগমৰ মা গংগা আৰু মা যমুনাৰ আশীৰ্বাদ আছে । প্ৰয়াগৰাজ হৈছে সকলো তীৰ্থযাত্ৰাৰ সৰ্বোচ্চ স্থান । গতিকে ইয়াত পবিত্ৰ স্নান কৰাৰ আনন্দ বহু জন্মৰ গুণৰ পিছতহে লাভ কৰা হয় । মই ইয়াত মধ্যপ্ৰদেশৰ জনসাধাৰণৰ সুস্থতাৰ বাবে প্ৰাৰ্থনা জনাইছোঁ, বিশেষকৈ যুৱ আৰু সমাজৰ প্ৰতিটো শ্ৰেণীৰ ভাগ্যৰ বাবে ।"
X-ৰ এটা পোষ্টত মুখ্যমন্ত্ৰী যাদৱে লিখিছে, "আজি মই মোৰ পত্নীৰ সৈতে প্ৰয়াগৰাজ মহাকুম্ভৰ পৱিত্ৰ ত্ৰিবেণী সংগমত স্নান কৰো আৰু প্ৰবাহিত নদীত পূজা কৰো । ই মোক দৈৱত্বৰ অনুভূতিৰে মন ভৰাই তুলিছে । মই কামনা কৰো যে মা গংগা, মা যমুনা আৰু মা সৰস্বতীৰ প্ৰবাহ অনন্তকালৰ বাবে নিৰৱচ্ছিন্ন হৈ থাকক আৰু সকলোৱে আশীৰ্বাদ লাভ কৰক ।"
উল্লেখ্য যে, পুহৰ পূৰ্ণিমাত (13 জানুৱাৰী) আৰম্ভ হোৱা এই মহাকুম্ভ হৈছে বিশ্বৰ সৰ্ববৃহৎ আধ্যাত্মিক আৰু সাংস্কৃতিক সমাৱেশ । ই সমগ্ৰ বিশ্বৰ ভক্তসকলক আকৰ্ষিত কৰি আহিছে । এই মহাকুম্ভ ২৬ ফেব্ৰুৱাৰীৰ মহা শিৱৰাত্ৰিলৈকে অব্যাহত থাকিব ।
অনুষ্ঠানটোৱে ইতিমধ্যে সমগ্ৰ দেশ আৰু সমগ্ৰ বিশ্বৰ লাখ লাখ ভক্তক আকৰ্ষিত কৰিছে । আনহাতে ইয়াত উপস্থিতি আৰু অংশগ্ৰহণৰ ক্ষেত্ৰত এক নতুন অভিলেখ স্থাপন কৰিব বুলি আশা কৰা হৈছে ।
