"অসমীয়া জাতি ধ্বংস হ’লে অসমত বাস কৰা হিন্দু বঙালীসকলো ধ্বংস হ’ব"-শিলাদিত্যদেৱ

এন আৰ চিক নেছনেল পপুলেছন ৰেজিষ্টাৰলৈ পৰিৱৰ্তিত কৰি নতুনকৈ এন আৰ চি প্ৰস্তুতৰ দাবী শিলাদিত্যৰ । বাংলাদেশী মুছলমানৰ আগ্ৰাসনৰ পৰা অসমক বচাবলৈ হিন্দু বঙালীসকলে নিজকে অসমীয়া বুলি পৰিচয় দিবলৈ আহ্বান বিধায়ক শিলাদিত্যৰ ৷

ওদালগুৰি, 28ছেপ্টেম্বৰঃ "অসমীয়া জাতি ধ্বংস হ’লে অসমত বাস কৰা হিন্দু বঙালীসকলো ধ্বংস হ’ব ৷ সেয়ে অসমখনক জেহাদী সমৰ্থনপুষ্ট বাংলাদেশী মুছলমানৰ আগ্ৰাসনৰ পৰা ৰক্ষা কৰিবলৈ হিন্দু বঙালীসকলেও নিজৰ কৰ্তব্য পালন কৰিব লাগিব ৷ অসমত আশ্ৰয় দিয়াৰ বাবে সকলো অসমীয়াৰ প্ৰতি কৃতজ্ঞতা জনাই হিন্দু বঙালীসকলে নিজকে অসমীয়া বুলি পৰিচয় দি অসমত দুৰ্গা পূজা,বিহু আদি একেলগে উদযাপন কৰিবলৈ বঙালীসকলে আগভাগ লওঁক ৷"- শনিবাৰে ওদালগুৰিৰ টংলা নগৰৰ তিনি নং খণ্ডৰ গোবিন্দ মন্দিৰ প্ৰাংগণত সদৌ অসম বঙালী যুৱ-ছাত্ৰ ফেডাৰেশ্বনৰ সভাপতি কমল চৌধুৰীৰ সঞ্চালনাত অনুষ্ঠিত এন আৰ চি সজাগতা সভাত অংশগ্ৰহণ কৰি এই মন্তব্য কৰে বিধায়ক শিলাদিত্য দেৱে ৷

এন আৰ চি খনক নেচনেল পপুলেচন ৰেজিষ্টাৰ ৰূপে ৰূপান্তৰ কৰি ১৯৫১ চনক ভিত্তি বৰ্ষ ৰূপে লৈ নাগৰিক পঞ্জী নতুনকৈ প্ৰস্তুত কৰাৰ দাবী হোজাই বিধায়ক শিলাদিত্যদেৱৰ । বিধায়ক শিলাদিত্য দেৱে এই দাবী জনোৱাৰ লগতে বাংলাদেশী মুছলমানৰ নাম সন্নিবিষ্ট নকৰাকৈ অসমত ৰাষ্ট্ৰীয় নাগৰিক পঞ্জী প্ৰস্তুত কৰিলেহে অসমৰ ভৱিষ্যত সুৰক্ষিত হ’ব বুলি মত প্ৰকাশ কৰে ৷
ইপিনে শিলাদিত্য দেৱে লগতে কয় যে অসমীয়া জাতি ধ্বংস হ’লে অসমত বাস কৰা হিন্দু বঙালীসকলো ধ্বংস হ’ব ৷ সেয়ে অসমখনক জেহাদী সমৰ্থনপুষ্ট বাংলাদেশী মুছলমানৰ আগ্ৰাসনৰ পৰা ৰক্ষা কৰিবলৈ হিন্দু বঙালীসকলেও নিজৰ কৰ্তব্য পালন কৰিব লাগিব ৷ আনহাতে যিদিনাৰ পৰা হিন্দু বঙালীসকলেও অসমীয়াৰ নামঘৰত শান্তি বিচাৰি প্ৰাৰ্থনাত মিলিত হ’ব,সেইদিনাৰ পৰাই হিন্দুত্ববাদীৰ শক্তি বৃদ্ধি পাব বুলি তাৎপৰ্যপূৰ্ণ মন্তব্য কৰে বিধায়ক শিলাদিত্যদেৱে ৷