ওদালগুৰি,২৪ আগষ্ট: ওদালগুৰিত সাংসদ দিলীপ শইকীয়াৰ সংবাদমেল । সংবাদমেলত হাগ্ৰামা মহিলাৰীক তীক্ষ্ণ সমালোচনা শইকীয়াৰ । সাংসদগৰাকীয়ে কয় যে হাগ্ৰামা মহিলাৰীক ক্ষমতা লাগে । আমি তেওঁ ক্ষমতা পোৱাটো বিচাৰোঁ । কিন্তু এতিয়া তেওঁ ক্ষমতা নাপাই বুলি সংবাদমেলত মন্তব্য প্ৰকাশ কৰে সাংসদ দিলীপ শইকীয়াই ।
লগতে তেওঁ কয় যে, UPPL ৰ সৈতে মিত্ৰতা থকালৈকে প্ৰমোদ বড়ো বিটিচি প্ৰধান হিচাপে থাকিব । এই সন্দৰ্ভত কোনো সিদ্ধান্ত গ্ৰহণ কৰিবলগীয়া হ'লে কেন্দ্ৰৰ পৰা নিৰ্দেশ আহিব লাগিব । কিন্তু ২০২৪ চনৰ লোকসভা নিৰ্বাচন আৰু ২০২৫ চনৰ বিটিচি নিৰ্বাচনলৈকে UPPL ৰ সৈতে মিত্ৰতা থাকিব বুলিও উল্লেখ কৰে সাংসদগৰাকীয়ে । ইয়াৰোপৰি UPPL ৰ সৈতে মিত্ৰতা কোনো কাৰণতে ভংগ নহয় বুলিও ষ্পষ্ট কৰি দিয়ে দিলীপ শইকীয়াই ।
হাগ্ৰামা মহিলাৰীয়ে আবেগিকভাৱে বিটিচিবাসীক বুৰ্বক সজোৱাৰ বাবে কিছুমান নাটক কৰি আছে বুলি কটাক্ষ কৰি এই ক্ষেত্ৰত বিটিচিবাসীক সজাগ হ'বলৈ আহ্বান জনাই সাংসদ দিলীপ শইকীয়াই । ২০০৩ ৰ পৰা ২০২০ লৈকে ১৭ বছৰ বিপিএফৰ শাসন কালত বিটিচিত উদ্ভৱ হোৱা অনাহুত পৰিস্থিতি সন্দৰ্ভতো মন্তব্য প্ৰকাশ কৰে শইকীয়াই । দৰমহাৰ এটা অংশ উগ্ৰবাদী সংগঠনক দিয়াকে আদি কৰি সংশয়ৰ মাজত বিটিচিবাসীয়ে জীৱন নিৰ্বাহ কৰিবলগীয়া হৈছিল বুলি উল্লেখ কৰে সাংসদগৰাকীয়ে ।
উল্লেখ্য যে আজি কিছুদিন পূৰ্বে দুটা কাৰ্যকালৰ ওদালগুৰি জিলা বিজেপিৰ সভাপতি, ৰাজ্যিক কাৰ্যনিৰ্বাহক কাৰ্তিক বড়োৱে ৰাজ্যিক বিজেপিৰ নেতৃত্বৰ প্ৰতি ক্ষোভিত হৈ বিজেপি এৰি বিপিএফত যোগদান কৰিছিল । তাৰ পিছতে তেওঁ বিজেপিৰ নেতৃত্বৰ বিৰুদ্ধে কেতবোৰ অভিযোগ আনিছিল আৰু অৱশেষত সাংসদ দিলীপ শইকীয়াই কাৰ্তিক বড়োৱে কৰা অভিযোগ খণ্ডন কৰিবলৈ ওদালগুৰি জিলা বিজেপিৰ কাৰ্যালয়ত বুধবাৰে আয়োজন কৰে এই সংবাদমেলখনি ।
তেওঁলোকে দিয়া অভিযোগবোৰৰ কোনো ভিত্তি নাই, কোনো বাস্তৱতা নাই বুলি কৈ কাৰ্তিক বড়োৱে নিজৰ স্বাৰ্থ পূৰণ নোহোৱাৰ বাবে দল এৰি গৈছে বুলি মন্তব্য কৰে শইকীয়াই । এতিয়া প্ৰশ্ন হয় কোন হয় কাৰ্তিক বড়ো ? কি ইমান গণভিত্তি আছে তেওঁৰ যাৰ বাবে দিলীপ শইকীয়াই সংবাদ মেল আয়োজন কৰিব লগা হ'ল ? প্ৰকৃততে বিজেপিত খহনীয়া আৰম্ভ হৈছে নেকি, একনায়কত্ব চলিছে নেকি ? যাৰ বাবে দলত কোনো দিনে গুৰুত্ব নোপোৱা কাৰ্তিক বড়োৱে বিজেপি দল ত্যাগ কৰাৰ লগে লগে সংবাদমেল সম্বোধন কৰিব লগা হ'ল সাংসদ দিলীপ শইকীয়াই ?
লগতে পঢ়ক: Singer Trolukya Sonowal death: চিনাকী মাতটো আজি ৰুদ্ধ হৈ ৰ’ল; অজান দেশলৈ গ’ল গৈ ত্ৰৈলোক্য সোণোৱাল
