শদিয়াত বন্যহস্তীয়ে প্ৰাণ ল’লে এগৰাকী মহিলাৰ

মঙলবাৰে নিশা শদিয়াত বন্যহস্তীৰ আক্ৰমণত নিহত হয় এগৰাকী মহিলা ৷ প্ৰচণ্ড ধুমুহাৰ পৰা পৰিত্ৰাণ পাবলৈ অন্য এঘৰলৈ আশ্ৰয় ল’বলৈ যাঁওতেই বন্যহস্তীয়ে প্ৰাণ লয় মহিলা গৰাকীৰ ৷

শদিয়া,4 নৱেম্বৰ : শদিয়াত বন্যহস্তীয়ে প্ৰাণ কাঢ়িলে এগৰাকী মহিলাৰ । মহিলা গৰাকীৰ শৰীৰ চিহ্ন-বিচিহ্ন কৰিলে বনৰীয়া হস্তীয়ে। নিহত মহিলা গৰাকী বাঘজান থানাৰ অন্তৰ্গত কেছেৰুগুৰি গাওঁৰ অলিমা মৰাণ বুলি চিনাক্ত কৰা হৈছে ।

শদিয়াত বন্যহস্তীয়ে প্ৰাণ ল’লে এগৰাকী মহিলাৰ

উল্লেখ্য যে,126 নং শদিয়া বিধানসভা সমষ্টিৰ অন্তৰ্গত লংপিট নামৰ ঠাইত বিগত দহ বছৰ পূৰ্বৰ পৰাই খেতি কৰি নিগাজিকৈ বসবাস কৰি আহিছে অলিমা মৰাণৰ পৰিয়ালটোৱে । দুৰ্ভাগ্যবশতঃ মঙলবাৰে নিশা প্ৰচণ্ড ধুমুহাত সম্পূৰ্ণৰূপে ভাঙি তচনচ কৰে মহিলা গৰাকীৰ বাসগৃহ ৷

নিজ স্বামী, পুত্ৰসহ বসবাস কৰা মহিলাগৰাকীয়ে বতাহ-বৰষুণৰ পৰা পৰিত্ৰাণ পাবলৈ ওচৰৰে অন্য এঘৰলৈ আশ্ৰয় ল’বলৈ যাঁওতেই বন্যহস্তীয়ে প্ৰাণ লয় মহিলা গৰাকীৰ ৷ অৱশ্যে সৌভাগ্য ক্ৰমে প্ৰাণ ৰক্ষা পৰে অন্য পাঁচ গৰাকী লোকৰ ।

লগতে পঢ়ক : নগাঁও আৰক্ষী অধীক্ষকৰ কাৰ্যালয়ত কি কৰিছে শুকুৰ আলীয়ে !