মাৰ্ঘেৰিটা,17 জুন : আৰ্থিকভাৱে দুৰ্বল লোকসকলে সম্পূৰ্ণ বিনামূলীয়াকৈ বিদ্যুৎ সংযোগৰ সুবিধা লাভ কৰাৰ হেতুকে প্ৰধানমন্ত্ৰীৰ সৌভাগ্য আঁচনি(Pradhanmantri sabhagya yojna) আৰম্ভ কৰা হৈছিল ৷ এই আঁচনিৰ যোগেদি দেশৰ ভিতৰুৱা গাঁৱৰ লোকসকলে যাতে বিজুলী সংযোগৰ পৰা বঞ্চিত নহয় সেই লক্ষ্য নিৰ্ধাৰণ কৰা হৈছিল ৷ শেহতীয়াকৈ তিনিচুকীয়াৰ মাৰ্ঘেৰিটাত এই আঁচনিখনৰ ৰূপায়ণৰ ক্ষেত্ৰত ব্যাপক বিসংগতি হোৱাৰ অভিযোগ উত্থাপিত হৈছে ৷
উল্লেখযোগ্য যে, এই আঁচনিৰ অধীনত বিদ্যুৎ সংযোগ পোৱাৰ সাত মাহ অতিক্ৰম কৰিলে যদিও মাৰ্ঘেৰিটাৰ লিখাজানৰ অতি পিছপৰা অঞ্চলটোৰ লোকসকলে আজি পৰ্যন্ত বিজুলীৰ পোহৰ পাবলৈ সক্ষম হোৱা নাই ৷ ইলেকট্ৰ' কিং (electro king) নামৰ এটা বিদ্যুৎ সংযোগকাৰী প্ৰতিষ্ঠানে বিজুলী সংযোগ কৰিলে যদিও মিটাৰৰ অভাৱত প্ৰায় 60 টা পৰিয়াল থকা গাঁৱখনৰ ৰাইজে আজিলৈকে নাপালে বিজুলীৰ সংযোগ ৷ ইফালে, বিনামূলীয়া আঁচনিখন ৰূপায়ণৰ পৰিৱৰ্তে এপিডিচিএল(APDCL)ৰ কৰ্তৃপক্ষই গাঁৱবাসীৰ পৰা চিকিউৰিটিৰ ধন বিচৰা বুলি অৱগত কৰিছে ৰাইজে ৷
উল্লেখ্য যে, সৌভাগ্য আঁচনিৰ নিয়ম অনুযায়ী বিজুলী সংযোগ কৰা প্ৰতিষ্ঠানৰ পৰা গ্ৰাহকৰ ঘৰত মিটাৰ আৰু বিজুলী সংযোগ সম্পূৰ্ণ হোৱাৰ পাছতহে থাৰ্মেলে দায়িত্ব ল’ব লাগে ৷ কিন্তু আধাতে দায়িত্ব লৈ এতিয়া গ্ৰাহকৰ পৰা দহ হাজাৰ টকাকৈ চিকিউৰিটিৰ ধন বিছৰা কাৰ্যত ক্ষোভিত হৈ পৰিছে ৰাইজ ৷ আনহাতে, কৰ’ণা মহামাৰাীৰ বাবে সম্প্ৰতি আয়হীন হৈ পৰা ৰাইজে দহ হাজাৰকৈ টকা ক’ৰ পৰা দিব বুলিও উদ্বেগ প্ৰকাশ কৰিছে ৷
লগতে পঢ়ক : পতঞ্জলি উদ্যোগত হাতীৰ মৃত্যু : আজিও নহ’ল উচিত তদন্ত !
