ডুমডুমা, 3 জুন : আঠ দিন পাৰ হৈ যোৱাৰ পাচতো বাঘজানৰ অইল ইণ্ডিয়াৰ তৈলখাদৰ পৰা নিৰ্গৰিত হৈ আছে তেল সংমিশ্ৰিত গেছ । ফলত চৰম দুৰ্ভোগ ভুগিব লগীয়া হৈছে অঞ্চলবাসীয়ে । বুধবাৰে ডুমডুমাৰ ৰাজহ চক্ৰ বিষয়াৰ কাৰ্যালয়ত অইল ইণ্ডিয়াৰ কৰ্তৃপক্ষ আৰু বাঘজান বাসী ৰাইজৰ এটা প্ৰতিনিধিৰ দলৰ মাজত এক গুৰুত্বপূৰ্ণ বৈঠক অনুষ্ঠিত হয় ।
অইল ইণ্ডিয়াৰ আমন্ত্ৰণ মৰ্মে অনুষ্ঠিত হোৱা বৈঠকত বাঘজান বাসী ৰাইজৰ দাবী চনদৰ ওপৰত আলোচনা কৰা হয় ৷ বাঘজান বাসী ৰাইজৰ প্ৰতিনিধিৰ দলটোৱে সাংবাদিকক জনোৱা অনুসৰি আশানুৰূপ নহ'ল বৈঠকখন ৷ অইল ইণ্ডিয়া কৰ্তৃপক্ষক ক্ষতিগ্ৰস্ত লোকসকলৰ দাবী পূৰণৰ বাবে বৃহস্পতিবাৰে দিনৰ ১২ বজালৈকে অন্তিম সময়সীয়া বান্ধি দিছে ৰাইজে ।
উক্ত সময়খিনিৰ ভিতৰত যদিহে অইল ইণ্ডিয়া কৰ্তৃপক্ষই বাঘজান বাসী ৰাইজৰ দাবী চনদ মানি লৈ লিখিত প্ৰতিশ্ৰুতি প্ৰদান নকৰে তেন্তে ক্ষতিগ্ৰস্ত বৃহতৰ অঞ্চলটোৰ ৰাইজে অইল ইণ্ডিয়াৰ বিৰুদ্ধে জংগী আন্দোলন গঢ়ি তোলাৰ হুংকাৰ প্ৰদান কৰে । আনহাতে, তিনিচুকীয়া জিলা উপায়ুক্তৰ নেতৃত্বত অইল ইণ্ডিয়া কৰ্তৃপক্ষৰ সৈতে বাঘজানবাসী ৰাইজৰ এক উচ্চ পৰ্যায়ৰ বৈঠকৰ দাবী কৰে প্ৰতিনিধিৰ দলটোৱে ।
উল্লেখযোগ্য যে, বাঘজানৰ অইল ইণ্ডিয়াৰ "BGR-5" নম্বৰ তৈলখাদত সংঘটিত হোৱা বিস্ফোৰণৰ ফলত অহৰহ তেল সংমিশ্ৰিত গেছ নিৰ্গত হৈ আছে ৷ এই নিৰ্গমন বন্ধ কৰিবলৈ চিংগাপুৰৰ পৰা দুগৰাকী বিশেষজ্ঞ অহাৰ কথা জনাইছে অইল ইণ্ডিয়া কৰ্তৃপক্ষই ।
লগতে পঢ়ক : অস্ত্ৰ হাতত ল'লে অসম আৰক্ষী বহি নাথাকেঃ ভাস্কৰজ্যোতি মহন্ত
