তিনিচুকীয়া, 23 নৱেম্বৰ : 22 নৱেম্বৰ অৰ্থাৎ বুধবাৰৰ দিনা তিনিচুকীয়া জিলাৰ কাকপথাৰত সংঘটিত হয় এক গ্ৰেণেড নিক্ষেপৰ ঘটনা ৷ বাইকত অহা দুষ্কৃতিকাৰীয়ে ডিৰাক কপাহতলীত ভাৰতীয় সেনা বাহিনীৰ চাউনিলৈ লক্ষ্য কৰি এই গ্ৰেণেড নিক্ষেপ কৰিছিল ৷ সন্ধিয়াৰ এই ঘটনাটোৱে উজনি অসমত এক উত্তেজনাময় পৰিৱেশৰ সৃষ্টি কৰে ৷ যিহেতু 28 নৱেম্বৰত আলফা স্বাধীনৰ প্ৰতিবাদ দিৱস, তাৰ প্ৰাকক্ষণত এই গ্ৰেণেড বিস্ফোৰণে সকলোৰে মনত আলফা স্বাধীনৰ স্থিতিক লৈ সন্দেহৰ সৃষ্টি কৰিছে ৷
প্ৰাপ্ত তথ্য অনুসৰি, সেনা বাহিনীৰ শিবিৰৰ কাষতে পৰি বিস্ফোৰিত হয় গ্ৰেণেডটো ৷ গ্ৰেণেড বিস্ফোৰণত অৱশ্যে কোনো লোক হতাহত হোৱা নাই ৷ পৰৱৰ্তী সময়ত সমগ্ৰ অঞ্চলটোত আৰক্ষীৰ বৃহৎ দল উপস্থিত হৈ কটকটীয়া নিৰাপত্তা ব্যৱস্থা গঢ়ি তোলে ৷
মন কৰিবলগীয়া কথাটো হ’ল যে, বিস্ফোৰণৰ পিছদিনাই তিনিচুকীয়া আৰক্ষীৰ জালত পৰিছে এজন আলফা(স্বাঃ)ৰ কেডাৰ ৷ তিনিচুকীয়া আৰক্ষীৰ জালত পৰা কেডাৰগৰাকী অচ্যুতানন্দ নেওগ ওৰফে নিলয় অসম । নিলয় অসম আলফা(স্বাঃ)ৰ বিশেষ অভিযানকাৰী গোটৰ সদস্য আছিল বুলি বিশেষ সূত্ৰত প্ৰকাশ পাইছে । তিনিচুকীয়াৰ বিভিন্ন স্থানত বিস্ফোৰণৰ পৰিকল্পনাৰে আহিছিল নিলয় অসম ৷
2022 ত পত্নীসহ আলফা(স্বাঃ)লৈ গৈছিল কৰিছিল নিলয় অসমে । সম্প্ৰতি আলফা স্বাধীনতেই আছে নিলয় অসমৰ পত্নী । উল্লেখযোগ্য যে, আলফা স্বাধীনৰ 28 নৱেম্বৰত প্ৰতিবাদ দিৱস ৷ প্ৰতিবাদ দিৱসৰ প্ৰাকক্ষণত তিনিচুকীয়া জিলাৰ বিভিন্ন প্ৰান্তত বোমা বিস্ফোৰণ কৰাৰ উদ্দেশ্যেই শিবিৰৰ পৰা নামি অহাৰ সন্দেহ প্ৰকাশ কৰিছে আৰক্ষীয়ে ৷ ইতিমধ্যে নিলয় অসমক আটক কৰি তিনিচুকীয়া আৰক্ষীয়ে অধিক তথ্যৰ সন্ধানত মাৰাথন জেৰা অব্যাহত ৰাখিছে ৷ পৰৱৰ্তী সময়ত আৰক্ষীৰ তদন্ততহে পোহৰলৈ আহিব সকলো তথ্য ।
এতিয়া বুধবাৰে সন্ধিয়া কাকপথাৰৰ ডিৰাক আৰ্মী কেম্পৰ সমীপত গ্ৰেণেড নিক্ষেপ কৰাৰ ঘটনাও আলফা স্বাধীনে কৰা বুলিয়ে সন্দেহ প্ৰকাশ কৰা হৈছে আৰু গ্ৰেণেডটো বিস্ফোৰিত হোৱাৰ পাচতে আৰক্ষীয়ে চৌদিশে তন্ন-তন্নকৈ অভিযান অব্যাহত ৰাখিছে ৷
লগতে পঢ়ক : Minister Bimal Borah: আলফা (স্বা)লৈ যোৱাৰ চিন্তা বাদ দিবলৈ অসমৰ যুৱচামক আহ্বান মন্ত্ৰী বিমল বড়াৰ
