তিনিচুকীয়া, 20 অক্টোবৰঃ দেওবাৰে পুৱতি নিশা পুনৰ ৰক্তাক্ত হৈ পৰে নাগালেণ্ডৰ মন জিলা ৷ আছাম ৰাইফলছৰ সৈতে সংঘৰ্ষত লিপ্ত হয় বিদ্ৰোহী সংগঠন এনএছচিএন(খাপলাং) আৰু আলফা স্বাধীনৰ এটা 50জনীয়া বিদ্ৰোহীৰ দলে ৷
মন জিলাৰ শ্বেনলইশ্ব বস্তিত সংঘটিত হয় এই ভয়ংকৰ এম্বুশ্ব ৷ 40 আছাম ৰাইফলছৰ এটি পহৰাদাৰী দলৰ ওপৰত লক্ষ্য কৰি পূৰ্বৰে পৰাই খাপ পিটি থকা বিদ্ৰোহীৰ দলটোৱে চলাই এই ভয়ংকৰ আক্ৰমণ ৷ বিদ্ৰোহী দলটোৰ আক্ৰমণৰ ফলত আছাম ৰাইফলছৰ এজন জোৱান গুৰুতৰভাৱে আহত হোৱা বুলি জানিব পৰা গৈছে ৷
সমগ্ৰ আক্ৰমণৰ ঘটনাটো আলফা স্বাধীনৰ ইষ্টাৰ্ণ কামাণ্ডৰ কামাণ্ডাৰ নয়ন মেধি আৰু এনএছচিএন (খাপলাং)ৰ কামাণ্ডাৰ ন্যামলাঙৰ নেতৃত্বত হোৱা বুলি সন্দেহ কৰিছে সেনাৰ চোৰাংচোৱাই ৷ ইতিমধ্যে সমগ্ৰ অঞ্চলটো সেনাৰ লগতে আছাম ৰাইফলছে ঘেৰি লৈ তালাচী অভিযান অব্যাহত ৰাখিছে ৷
উল্লেখ্য যে, চলিত বৰ্ষৰ মে' মাহতো মন জিলাৰ ম্যানমাৰ সীমান্তৱৰ্তী উষা আৰু তবু নামৰ ঠাইত ভয়ংকৰ আক্ৰমণ সংঘটিত কৰিছিল এনএছচিএন(খাপলাং) গোটে ৷ এই আক্ৰমণত আছাম ৰাইফলছৰ দুজনকৈ ৰাইফলমেন শ্বহীদ হৈছিল ৷
