শদিয়া,24 ডিচেম্বৰ: ৰাজ্যৰ বিভিন্ন প্ৰান্তৰ লগতে তিনিচুকীয়াটো অব্যাহত আছে গৰু চোৰৰ ঘটনা ৷ কাকপথাৰৰ সমীপৰ ডাঙৰী ন-পথাৰত গৰু চোৰে চলাইছে তাণ্ডৱ ৷ একে নিশাই তিনিটাকৈ গৰু চোৰ কৰাৰ যো-জা কৰোতে চুৰি গৰুসহ স্থানীয় ৰাইজে আটক কৰিলে গৰুচোৰক ৷ AS-23CC-0359 নম্বৰৰ টাটা ACE বাহনখনত তিনিটা গৰু চুৰি কৰি গৈ থাকোতে স্থানীয় ৰাইজে আটক কৰে বাহনখনৰ চালক আৰু গৰু চোৰক ৷ ইয়াৰে এজনৰ নাম পুলিচ চাহানী আৰু আনজনৰ নাম হ'ল কল্যাণ মেধী ৷ স্থানীয় ৰাইজে নিশায়ে গাড়ীসহ চোৰ দুজনক স্থানীয় আৰক্ষীৰ হাতত চমজাই দিয়ে ৷
উল্লেখ্য যে,ডাঙৰী ন-পথাৰ অঞ্চলৰ পৰা অৰুণাচল সীমান্তৰ ডিৰাক গেট পাৰ হৈ মাইঠং,মৃদংপৰা পথেৰে ন-পথাৰ,বৰ-পথাৰ,মেগেলা হৈ চোৰাং গৰু,চোৰাং কাঠ আদিকে ধৰি বিভিন্ন ধৰনৰ অবৈধ আৰু চোৰাং ব্যৱসায়ৰ লগত জড়িত বাহন অহৰহ চলাচল হৈ আহিছে ৷ বিষয়টো সন্দৰ্ভত ৰাইজে বাৰে বাৰে জিলা প্ৰশাসনক অৱগত কৰাৰ পাচতো কোনো গুৰুত্ব নিদিয়াৰ অভিযোগ উত্থাপন কৰিছে স্থানীয় ৰাইজে ৷
লগতে পঢ়ক: অবৈধভাৱে ৰেলৰ টিকট বিক্ৰী: বঙাইগাঁৱত আৰপিএফ ৰ অভিযান
