তিনিচুকীয়া,২০জুনঃ তিনিচুকীয়া আৰক্ষীৰ সফলতা । ৭ জুনত তিনিচুকীয়া ৰঙপুৰীয়াৰ শিউপুৰ চাহ বাগিচাত গণপ্ৰহাৰ কৰি মাতৃ-পুত্ৰক হত্যা কৰিছিল একাংশ উত্তেজিত লোকে৷ আইন হাতত তুলি লোৱাৰ অপৰাধত আৰক্ষীয়ে তিনিচুকীয়া সদৰ থানাত ভাৰতীয় দণ্ডবিধি আইনৰ কেইবাটাও ধাৰাত এক গোচৰ ৰুজু কৰি তিনিচুকীয়াৰ অতিৰিক্ত আৰক্ষী অধীক্ষক ৰিপুঞ্জয় কাকতিৰ নেতৃত্বত ক্ষিপ্ৰতাৰে এই ঘটনাৰ তদন্ত চলাইছিল ৷ হত্যাকাণ্ডত জড়িত মূল একৈশ গৰাকী অপৰাধীক চিনাক্ত কৰি বৃহস্পতিবাৰে ১৭ গৰাকী লোকক আটক কৰে ৷ ইয়াৰ পূৰ্বে ৪ গৰাকীক আটক কৰি জেললৈ প্ৰেৰণ কৰিছিল আৰক্ষীয়ে ৷ ইয়াৰে ১১ গৰাকী মহিলা আৰু ১০ জন পুৰুষ অপৰাধী ৷
উল্লেখ্য যে,৭ জুনত তিনিদিন ধৰি সন্ধানহীন হৈ থকা এগৰাকী মহিলা শৌচাগাৰৰ গাঁতত মৃত অৱস্থাত উদ্ধাৰ হোৱাৰ পাছতে পৰিস্থিতি উত্তপ্ত হৈ মহিলাগৰাকীৰ স্বামী আৰু শাহুৱেক আৰক্ষীৰ সন্মুখতে গণপ্ৰহাৰ কৰিছিল ৰাইজে ৷ ঘটনাস্থলীতে মৃত্যু হৈছিল যমুনা তাঁতী নামৰ মহিলা গৰাকীৰ । অন্যহাতে গুৰুতৰভাৱে আঘাতপ্ৰাপ্ত অজয় তাঁতীক তিনিচুকীয়াৰ অসামৰিক চিকিৎসালয়ত ভৰ্ত্তি কৰিছিল যদিও চিকিৎসকে মৃত ঘোষণা কৰিছিল৷
অধিক জানিবলৈ পঢ়কঃ গণপ্ৰহাৰঃ প্ৰকৃততে কি হৈছিল তিনিচুকীয়াত
