কাকপথাৰত পাঠদান অবিহনে অনুষ্ঠিত হ'ব ছমহীয়া পৰীক্ষা

কাকপথাৰৰ সৰুমেচাইৰ ললিত মৰাণ প্ৰাথমিক বিদ্যালয়ত পাঠদান নোহোৱাকৈয়ে অনুস্থিত হ'ব ছমহীয়া পৰীক্ষা ৷ বিদ্যালয়ৰ প্ৰধান শিক্ষয়িত্ৰীগৰাকীয়ে পাঁচটাকৈ শ্ৰেণীৰ দায়িত্ব অকলে পালন কৰিবলগা হৈছে ৷

কাকপথাৰ, 11 জুন : কাকপথাৰ শিক্ষা খণ্ডৰ অন্তৰ্গত সৰুমেচাইৰ ললিত মৰাণ প্ৰাথমিক বিদ্যালয়ত পাঠদান নোহোৱাকৈয়ে অনুষ্ঠিত হ'ব ছমহীয়া পৰীক্ষা ৷ ১৯৭৪ চনতে স্থাপিত বিদ্যালয়খনত বিগত তিনিবছৰে এজন শিক্ষকেই চলাই আছে পাঠদানকাৰ্য ৷ স্থানীয় ৰাইজে কেইবাবাৰো প্ৰতিবাদ কৰাৰ পাছত শিক্ষা বিভাগে যোৱা বৰ্ষত মাত্ৰ দুমাহৰ বাবে এগৰাকী শিক্ষয়িত্ৰী নি়যুক্তি দিছিল ৷ ২০১৮ চনৰ নবেম্বৰ মাহত আন এগৰাকী শিক্ষয়িত্ৰী নিযুক্তি দিছিল যদিও ব্যক্তিগত অসুবিধাৰ বাবে ছয় মহীয়া ছুটি লোৱাত প্ৰধান শিক্ষয়িত্ৰী গৰাকীয়ে অকলেই পাঁচটাকৈ শ্ৰেণীৰ পাঠদান কৰিব লগা হৈছে ৷ এতিয়া পাঁচটাকৈ শ্ৰেণীৰ দায়িত্ব অকলে পালন কৰিব লগা হোৱাত যথেষ্ট অসুবিধাৰ সন্মুখীন হৈছে প্ৰধান শিক্ষয়িত্ৰীগৰাকী ৷

শৌচাগাৰ, বিদ্যুতৰ উন্নত সুবিধা নথকা বিদ্যালয়খনত এতিয়া পাঠদানৰ অবিহনে কেনেদৰে ছাত্ৰ - ছাত্ৰীয়ে ভাল ফলাফল লাভ কৰিব এইয়া এক বৃহৎ প্ৰশ্ন হৈ পৰিছে ৷ বিদ্যালয়খনে সন্মুখীন হোৱা সমস্যাবোৰ প্ৰধান শিক্ষয়িত্ৰীগৰাকীয়ে উচ্চপদস্ত বিষয়াক লিখিতভাৱে জনোৱাৰ পাছতো কানসাৰ নিদিয়াৰ অভিযোগ উত্থাপন হৈছে ৷ 50 বছৰ গৰকা বিদ্যালয়খনত এজন পুৰুষ শিক্ষকক নিযুক্তি দিয়াৰ লগতে আন্তগাঁথনিৰ উন্নয়নৰ ক্ষেত্ৰতো সুবিধা প্ৰদান কৰিবলৈ আহ্বান জনাইছে স্থানীয় ৰাইজে ৷