ডুমডুমা,14 চেপ্তেম্বৰঃ ৰাষ্ট্ৰীয় নাগৰিকপঞ্জী প্ৰকাশৰ পিচতে ৰাজ্যজুৰি কংগ্ৰেছ দলে আৰম্ভ কৰিছে যাত্ৰা কাৰ্যসূচী ৷ ৰাষ্ট্ৰীয় নাগৰিকপঞ্জীৰ পৰা নাম বাদ পৰা লোকক সহায় কৰিবলৈ দলটোৱে এই যাত্ৰাৰ আয়োজন কৰিছে ৷
শেহতীয়াকৈ কংগ্ৰেছ নেতা ৰিপুন বৰা,দেবব্ৰত শইকীয়া,সাংসদ প্ৰদ্যুৎ বৰদলৈ,ৰকিবুল হুছেইন,বিধায়ক ৰূপজ্যোতি কুৰ্মী আৰু বিধায়ক দূৰ্গা ভূমিজৰ নেতৃত্বত এটা দল ডুমডুমাত উপস্থিত হয় ৷ ডুমডুমাত উপস্থিত হৈ ঢলা খৈৰাবাৰীত 2018 চনৰ 1 নৱেম্বৰত অজ্ঞাত আততায়ীৰ গুলীত নিহত হোৱা পাঁচগৰাকী লোকক শ্ৰদ্ধাঞ্জলি দিয়ে কংগ্ৰেছী নেতাকেইগৰাকীয়ে ৷
ডুমডুমাত উপস্থিত হৈ দেহত শেষবিন্দু তেজ থকালৈকে NRCৰ বিৰুদ্ধে যুঁজ দি যাম বুলি কয় ৰিপুন বৰাই ৷ আনহাতে বহু লোকে NRCৰ বাবে শংকিত হৈ মৃত্যুমুখত পৰিছে ৷ বিজেপিয়ে বাঙালী মানুহৰ আবেগক লৈ ৰাজনীতি কৰিছে,অসমৰ শৰণাৰ্থী শিবিৰত সকলোতকৈ বেছি বাঙালী লোক আছে বুলি কয় প্ৰদ্যুৎ বৰদলৈয়ে ৷ 2019 চনৰ পাচত নৰেন্দ্ৰ মোডীয়ে NRCৰ নামত ৰাজনীতি কৰি আহিছে,জনসাধাৰণৰ বন্ধু কংগ্ৰেছ, বিজেপি নহয় বুলি কয় ৰকিবুল হুছেইনে ৷ আনহাতে ৰাজনৈতিক দলসমূহক NRCক লৈ ৰাজনীতি নকৰিবলৈ সকীয়াই দিয়ে বাঙালী ফেডাৰেশ্বনে ৷
পৰৱৰ্তী সময়ত কংগ্ৰেছী দলটোৱে ডুমডুমাৰ পৰা জাগুনলৈ ৰাওনা হয় ৷
