তিনিচুকীয়া, ২৮ অক্টোবৰ: দুৰ্গা পূজাৰ দশমীৰ দিনাৰে পৰা ডুমডুমাৰ এটি ৯ বছৰীয়া শিশু আজি পৰ্যন্ত সন্ধানহীন হৈ আছে । ডুমডুমাৰ ৰূপাই চাইডিংস্থিত ITBP শিৱিৰৰ সমীপৰ মদন শ্বাহ নামৰ লোকজনৰ কনিষ্ঠা কন্যা ৯ বছৰীয়া ৰশ্নি শ্বাহে ঘৰৰ সন্মুখত দুৰ্গা পূজা মণ্ডপলৈ গৈছিল । কিন্তু কিছু সময়ৰ পিছতে কন্যা ৰশ্নিৰ সন্ধান নোপোৱাত পৰিয়ালৰ মাজত হুৱাদুৱা লাগে আৰু ৰশ্নিৰ সন্ধান আৰম্ভ কৰে যদিও শিশুটিৰ সন্ধান লাভ কৰিব পৰা নাই । পৰৱৰ্তী সময়ত পৰিয়ালৰ লোকে এই সন্দৰ্ভত ডুমডুমা আৰক্ষী থানাত দাখিল কৰে এজাহাৰ ।
ইয়াৰ পিচতেই বিভিন্ন স্থানত থকা CCTV ফুটেজৰ ভিক্তিত আৰক্ষীয়ে অভিযান অব্যাহত ৰাখিছে । উল্লেখযোগ্য যে সন্ধানহীন হোৱা শিশুটিৰ বাসগৃহৰ সমীপৰ CCTV কেমেৰাত দশমীৰ দিনা শিশুটিক দেখা গৈছে । দুৰ্গা পূজাৰ দশমীৰ দিনাৰে পৰা সন্ধানহীন হৈ থকা ৰশ্নি শ্বাহ নামৰ এই শিশুটিৰ সম্ভেদ লাভ কৰিলে 7002504392 নাইবা 9678456545 নম্বৰত যোগাযোগ কৰিবলৈ পৰিয়ালৰ লোকসকলে ৰাইজক কাতৰ আহ্বান জনাইছে ।
আনহাতে, আজি পৰিয়ালৰ লোকে প্ৰতিবাদ কৰাৰ উদ্দেশ্যে স্থানীয় লোকক আমন্ত্ৰণ দিবলৈ ঘৰে ঘৰে যাওঁতে এজন লোকৰ ঘৰত ৰশ্নিৰ মাতৃয়ে শিশুটিৰ চেন্ডেলযোৰ প্ৰত্যক্ষ কৰে আৰু চেন্দেলযোৰ লৈ ৰাইজৰ মাজত প্ৰতিক্ৰিয়াৰ সৃষ্টি কৰে ৷ ইয়াকে লৈ এতিয়া সৃষ্টি হৈছে তীব্ৰ চাঞ্চল্যৰ ৷ উক্ত ঘৰৰ গৃহস্থই উল্লেখ কৰা অনুসৰি দশমীৰ দিনা ঘৰত নাছিল কোনো লোক। ৰশ্নিৰ চেন্দেলযোৰ ওলোৱাৰ পাছতেই আৰক্ষীয়ে ঘৰখনৰ চাৰিওফালে, আশে পাশে থকা বাগান, হাবি ইত্যাদিত অভিযান তীব্রতৰ কৰি তুলিছে ।
