কাৰ ভুলৰ বাবে প্ৰতাৰিত হৈছে বাঘজানবাসী!

গত 27 মে‘ত বাঘজানৰ অভিশপ্ত BGR ৫ নং তৈলখাদত সংঘটিত বিস্ফোৰণে প্ৰভাৱ পেলাইছিল বাঘজানৰ দাতীকাষৰীয়া অঞ্চলসমূহত ৷ ভূকম্পন আৰু তীব্ৰ শব্দৰ মাজত প্ৰায় পাঁচটা মাহ পাৰ কৰিবলগীয়া হৈছিল ৰঙাগড়াবাসী ৰাইজে ৷ এই ঘটনাৰ পিছতে বহু লোকে হেৰুৱাইছিল নিজৰ ঘৰ, বহুতো জীৱ-জন্তুৰ মৃত্যু মুখত পৰাৰ উপৰিও মানুহৰ দেহটো বিভিন্ন অচিন ৰোগে দেখা দিয়াৰ অভিযোগ ৰাইজৰ ৷ বাঘজানবাসীৰ এইসমূহ সমস্যা আজিও সমস্যাই হৈয়ে আছে ৷ আগ্নিকাণ্ড সংঘটিত হোৱাৰ পিছৰে পৰা ধাৰাৱাহিকভাৱে ক্ষতিপূৰণ বিচাৰি প্ৰতিবাদ সাব্যস্ত কৰি আহিছে বাঘজানবাসীয়ে ৷

তিনিচুকীয়া,16 ডিচেম্বৰ: অৱশেষত বহু প্ৰচেষ্টাৰ অন্তত নিৰ্বাপিত হ’ল বাঘজানৰ জুই ৷ কিন্তু ইয়াৰ পিছতো সমস্যাৰ অন্ত পৰা নাই বাঘজানবাসীৰ ৷ বিগত 27 মে‘ত বাঘজানৰ অভিশপ্ত BGR ৫ নং তৈলখাদত সংঘটিত বিস্ফোৰণে প্ৰভাৱ পেলাইছিল বাঘজানৰ দাতিকাষৰীয়া অঞ্চলসমূহত ৷ ভূকম্পন আৰু তীব্ৰ শব্দৰ মাজত প্ৰায় পাঁচটা মাহ পাৰ কৰিবলগীয়া হৈছিল ৰঙাগড়াবাসী ৰাইজে ৷ অৱেশেষত সুদূৰ কানাডাৰ বিশেষজ্ঞৰ দলে নিৰ্বাপিত কৰিবলৈ সক্ষম হৈছিল জুই ৷ কিন্তু তেতিয়ালৈ ক্ষতিগ্ৰস্ত হৈছিল বহু দিশ ৷ বাঘজানৰ ঘটনাৰ পিছতে শেষ হৈ পৰিছিল নতুন ৰঙাগড়াবাসীৰ জীৱিকাৰ পথ । কিয়নো এই বিস্ফোৰণে প্ৰভাৱ পেলায় মাগুৰি মতাপুং বিল আৰু ডিব্ৰু নদীত, যাৰ ওপৰত নিৰ্ভৰ অঞ্চলটোৰ বহু ৰাইজৰ জীৱিকা ৷

এই ঘটনাৰ পিছতে বহু লোকে হেৰুৱাইছিল নিজৰ ঘৰ, বহুতো জীৱ-জন্তুৰ মৃত্যু মুখত পৰাৰ উপৰিও মানুহৰ দেহটো বিভিন্ন অচিন ৰোগে দেখা দিয়াৰ অভিযোগ ৰাইজৰ ৷ বাঘজানবাসীৰ এইসমূহ সমস্যা আজিও সমস্যাই হৈয়ে আছে ৷ আগ্নিকাণ্ড সংঘটিত হোৱাৰ পিছৰে পৰা ধাৰাৱাহিকভাৱে ক্ষতিপূৰণ বিচাৰি প্ৰতিবাদ সাব্যস্ত কৰি আহিছে বাঘজানবাসীয়ে ৷ পৰৱৰ্তী সময়ত অইল ইণ্ডিয়া কতৃপক্ষই এই ঘটনাত সম্পূৰ্ণৰূপে সৰ্বাস্ৰান্ত হোৱা লোকসকলক ক্ষতিপূৰণ প্ৰদানৰ ব্যৱস্থা কৰিছে যদিও এই ক্ষতিপূৰণ লাভৰ পৰা এতিয়াও বহু লোক বঞ্চিত থকাৰ অভিযোগ৷ সেয়েহে ক্ষতিপুৰণ প্ৰদানৰ দাবীত পুনৰ ৰঙাগড়া আঞ্চলিক আঞ্চলিক খেলপথাৰত বিগত ১০ ডিচেম্বৰৰ পৰা আমৰণ অনশন কাৰ্যসূচী গ্ৰহণ কৰিছে শতাধিক পুৰুষ মহিলাই ৷

অইল ইণ্ডিয়াই ক্ষতিপূৰণৰ আগধন নোপোৱা পৰ্যন্ত ভাড়াঘৰৰ বাবদ প্ৰতিটো পৰিয়ালক ৫০ হাজাৰকৈ দিয়াৰ ব্যৱস্থা কৰিছিল যদিও মাত্ৰ এবাৰেই ৫০ হাজাৰ টকা দি দায়িত্ব সামৰাৰ অভিযোগ ৰাইজৰ ৷ এই অনশন স্থলীৰ পৰাই ঘৰ ভাড়াৰ বাবদ প্ৰদান কৰা মূল্য অতি শীঘ্ৰে মোকলাই দিয়াৰ লগতে ক্ষতিগ্ৰস্থ পৰিয়ালসমূহক B কেটেগেৰিত অন্তভুক্ত কৰি উচিত ক্ষতিপুৰণ দিবলৈ দাবী জনায় অইল কৰ্তৃপক্ষক ।

অইলৰ দাবী তেওঁলোকে বাঘজানবাসীৰ বাবে জিলা প্ৰাশাসনৰ হাতত ইতিমধ্যে মোকলাই দিছে ক্ষতিপূৰণৰ সম্পূৰ্ণ ধন ৷ কিন্তু ৰাইজৰ অভিযোগ অইল ইণ্ডিয়াই মোকলাই দিয়া ধন লাভ কৰা নাই ভূক্তভোগী পৰিয়ালসমূহে ৷ এতিয়া প্ৰশ্ন হয় কাৰ ভুলৰ বাবে বাৰে বাৰে প্ৰতাৰিত হ’বলগীয়া হৈছে বাঘজানবাসী ৷ নিজৰ হেপাহৰ ঘৰখন, জীবিকা আদি সকলো হেৰুওৱা বাঘজানৰ পাৰ্শ্বৱৰ্তী অঞ্চল বৃহত্তৰ নতুন ৰঙাগড়াবাসীয়ে নিজৰ প্ৰাপ্যৰ বাবে এনদৰে ওলাই আহি কিয় কৰিবলগীয়া হৈছে প্ৰতিবাদ? সৰ্বস্ৰান্ত এই লোকসকলৰ ওপৰত দৃষ্টি পৰিবনে চৰকাৰৰ ? সেইয়া বৰ্তমানো এক ডাঙৰ প্ৰশ্ন ৷

লগতে পঢ়ক-শিৱসাগৰৰ হালোৱাটিত পথ নিৰ্মাণত বাধা নগা প্ৰশাসনৰ