চতিয়া,৯ জানুৱাৰীঃ শোণিতপুৰ জিলাৰ জামুগুৰিহাটৰ সমীপৰ কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা স্থানীয় লোকে আটক কৰে তিনিজন সন্দেহযুক্ত নাগৰিকক ৷ ঘটনাৰ বিৱৰণ অনুসৰি, যোৱা নিশা তিনিজন যুৱকে ষষ্ঠ সংযোজনৰ ভিতৰত নিশাৰ ভাগত প্ৰৱেশৰ চেষ্টা কৰা প্ৰত্যক্ষ কৰে পাণপুৰ মথাউৰিৰ ওপৰেদি মটৰ চাইকেল লৈ অহা দুজন ব্যক্তিয়ে ৷ ব্যক্তি দুজনে সদৰি কৰা মতে, মটৰ চাইকেলৰ পোহৰ দেখি তিনিওজনে দৌৰি পলাবলৈ চেষ্টা কৰে ৷
ইফালে তিনিজন যুৱক এইদৰে পলায়ন কৰাত অঞ্চলটোত এক আতংক আৰু হুলস্থুলীয়া পৰিৱেশৰ সৃষ্টি হয় ৷ ইয়াৰ লগে লগে গাঁৱৰ লোকসকল ওলাই আহি তৎক্ষণিকভাৱে তিনিজনকে আটক কৰে ৷ ৰাইজৰ অনুসন্ধানত লোককেইজনৰ নাম পানপুৰ কাচমাৰী গাঁৱৰ ক্ৰমে আব্দুল ৰহমান, বুলবুল হুছেইন আৰু আনাৰ বুলি জানিব পৰা যায় ৷
উল্লেখ্য যে, বন বিভাগৰ সৈতে গোপন মিতিৰালি কৰি ব্যক্তি তিনিজনে গৰু চুৰি কাৰ্যকে ধৰি অন্যান্য দুস্কাৰ্য সংঘটিত কৰিবলৈ কাজিৰঙা ৰাষ্ট্ৰীয় উদ্যানৰ ষষ্ঠ সংযোজনলৈ আহিছিল বুলি ৰাইজে সন্দেহ প্ৰকাশ কৰিছে । কাৰণ সন্দেহযুক্ত তিনিজন যুৱকক স্থানীয় লোকে আটক কৰাৰ সময়ত একাংশ বন বিভাগৰ লোক উপস্থিত থকা বুলি ৰাইজে অভিযোগ উত্থাপন কৰিছে । ৰাইজৰ সমাগমৰ ফলত বন বিভাগৰ লোককেইজনে ঘটনাস্থলীৰ পৰা পলায়ন কৰে বুলি জানিবলৈ দিছে স্থানীয় লোকে ।
ইয়াৰ সমান্তৰালভাৱে যুৱক তিনিজনে লৈ অহা সন্দেহত পাণপুৰ মথাউৰিৰ ওপৰত ৰখাই থোৱা AS-১২-AA-২৩১৬ নম্বৰৰ এখন অচিনাক্ত অল্ট’ গাড়ীও ভাঙি ক্ষতি সাধন কৰে জামুগুৰিহাটৰ ৰাইজে ৷ অৱশেষত ঘটনাস্থলীত জামুগুৰি আৰক্ষী থানাৰ এটা দল উপস্থিত হৈ তিনিজন যুৱকক আটক কৰি থানালৈ লৈ যায় ।
লগতে পঢ়ক : অখিল গগৈয়ে জেলত কটোৱা প্ৰতিটো দিনৰ উত্তৰ 21ত ৰাইজে দিবঃ চিত্ত ৰঞ্জন বসুমতাৰী
