তেজপুৰ,২৭ জানুৱাৰী: উচ্চতম ন্যায়ালয়ত নাগৰিকত্ব সংশোধনী আইন, ২০১৯ ৰ সম্পৰ্কে যোৱা ২২ জানুৱাৰীৰ শুনানিত মূলতঃ কি কি বিষয় উত্থাপন হৈছিল সেই কথা অসমৰ খিলঞ্জীয়া জনসাধাৰণৰ জনাৰ অধিকাৰ আছে । কিন্তু প্ৰচাৰ মাধ্যমে এই সন্দৰ্ভত বিতংভাৱে প্ৰচাৰ নকৰাৰ বাবে আজি সোমবাৰে তেজপুৰত 'তৰুণ অসম সংঘ'ত আয়োজিত এক সংবাদ মেলত এই অভিযোগ অসম সন্মিলিত মহাসংঘৰ গোচৰীয়া কাৰ্যকৰী সভাপতি মতিউৰ ৰহমান, ডঃ বিশ্বৰঞ্জন কলিতা,প্ৰণৱ কুমাৰ মজুমদাৰ আৰু দীপক কুমাৰ নাথৰ ।
শুনানীত জ্যেষ্ঠ অধিবক্তা বিকাশ সিঙে অবৈধ বিদেশীয়ে জুৰুলা কৰা অসমৰ পৰিস্থিতিৰ কথা দাঙি ধৰি কৈছিল যে, সমগ্ৰ দেশত বিদেশী চিনাক্তকৰণৰ বাবে বাহাল থকা ভিত্তি বছৰ ১৯৪৮ ৰ পৰিৱৰ্তে অসমত ১৯৭১ প্ৰয়োগ কৰাৰ বিৰুদ্ধে অসম সন্মিলিত মহা সংঘই ২০১২ চনত তৰা ৫৬২/২০১২ নং গোচৰটো ৫ জনীয়া সাংবিধানিক বিচাৰপীঠত ২০১৪ চনৰ ১৭ ডিচেম্বৰৰ পৰা ৫ বছৰ ধৰি চূড়ান্ত বিচাৰৰ বাবে পৰি আছে । অসমত বিদেশী চিনাক্তকৰণ ভিত্তি বছৰ ১৯৪৮ ৰ পৰা ১৯৫০ লৈ বৃদ্ধি কৰা হৈছিল আৰু বৰ্তমান ১৯৭১ কৰা হৈছে । ইয়াৰ সৈতে বৰ্তমানৰ নাগৰিকত্ব সংশোধনী আইন, ২০১৯ ৰ সম্পৰ্ক আছে । সেয়ে বিষয়টো শীঘ্ৰে সাংবিধানিক বিচাৰপিঠে চূড়ান্ত কৰা উচিত । লগতে এই আইন প্ৰয়োগ নকৰিবলৈ স্থগিতাদেশ দিয়া উচিত"বুলি আডালতাক জনাইছিল বুলি মহাসংঘৰ গোচৰীয়া মটিউৰ ৰহমানে জনায় ।
প্ৰায় ২ ঘণ্টা ধৰি শুনানী গ্ৰহণ কৰাৰ পিছত ২২ জানুৱাৰীত দিয়া নিৰ্দেশটো আছিল -"..ভাৰতৰ এটৰণী জেনেৰেল কে কে বেনুগোপালে ভাৰত চৰকাৰৰ হৈ সময় বিচৰাত আদালতে 8 সপ্তাহৰ ভিতৰত শপত নামা দাখিল কৰিবলৈ আৰু পঞ্চম সপ্তাহত গোচৰৰ শুনানিৰ বাবে পুনৰ নতুন দিন ধাৰ্য কৰিবৰ বাবে নিদেৰ্শ দিছিল ৷ লগতে এই সময়ছোৱাত ৰাজ্যসমূহৰ উচ্চ ন্যায়লয়সমূহত এই বিষয়ত কোনো গোচৰ নচলাবৰ বাবে নিৰ্দেশ দিছিল ৷ উচ্চতৰ ন্যায়লয়ৰ পঞ্জীয়নত দুটা পৃথক শ্ৰেণীত বিভক্ত কৰি এটাত ত্ৰিপুৰা আৰু অসমৰ আৰু আনটোত ভাৰতৰ আন ৰাজ্যসমূহৰ গোচৰসমূহ পঞ্জীয়ন কৰি পৃথকে পৃথকে শুনানি দিবলৈ নিদেৰ্শ দিছিল ৷ "
