ৰঙাপৰা,৪ এপ্ৰিলঃ পাঁচ বছৰৰ মূৰে মূৰে নিৰ্বাচন আহে আৰু যায় কিন্তু ৰাইজৰ সমস্যাবোৰ সমস্যা হৈ থাকি যায়, ইয়াকে লৈ এতিয়া ক্ষুব্ধ হৈ পৰিছে শোণিতপুৰ জিলাৰ মিছামাৰীবাসী । কাৰণ সুদীৰ্ঘ ২২ বছৰে এখন দলং নিৰ্মাণ নহ'ল মিছামাৰী অঞ্চলৰ বেলশিৰি নদীৰ ওপৰত। উপায়হীন হৈ বাৰিষাত টুলুঙা নাও আৰু খৰালিত বাঁহৰ সাঁকো নিৰ্মাণ কৰি নদীখন ইপাৰ-সিপাৰ হৈ আহিছে মিছামাৰীবাসীয়ে ।
উল্লেখ্য যে,১৯৯৮ চনত বাৰিষাৰ প্ৰলয়ংকৰী বানে গড়কাপ্তানী পথৰ বেলশিৰি নদীৰ ওপৰত থকা কাঠৰ দলংখন উটুৱাই নিয়াৰ পাছৰে পৰা অঞ্চলবাসী বিশেষকৈ ছাত্ৰ-ছাত্ৰীসকলে যাতায়তৰ ক্ষেত্ৰত চৰম দুৰ্ভোগ ভুগি আহিছে । উল্লেখ্য যে ভগ্ন দলংখনক নিৰ্বাচনী বিষয় হিচাপে লৈ তেতিয়াৰ পৰা বৰ্তমানলৈকে পঞ্চায়ত, বিধানসভা আৰু লোকসভাৰ কেইবাটাও নিৰ্বাচনৰ বৈতৰণী পাৰ কৰিছে জনপ্ৰতিনিধিসকলে। পুনৰ লোকসভা নিৰ্বাচন কাষ চাপিলে কিন্তু এই পৰ্যন্ত দলংখন নিৰ্মাণৰ ক্ষেত্ৰত কোনেও গুৰুত্ব প্ৰদান নকৰিলে । জানিব পৰা মতে, পূৰ্বৰ দৰে এইবাৰো এই বিষয়টোকে লৈ ইতিমধ্যে বিভিন্ন ৰাজনৈতিক দলৰ প্ৰাৰ্থী আৰু দলীয় কৰ্মীসকলে নিৰ্বাচনী কুচ-কাৱাজ চলাইছে ।
