মাজুলী, ৬ মাৰ্চ: মাজুলীৰ বনগাঁৱত যোৱা ৪ মাৰ্চত ভয়াৱহ অগ্নিকাণ্ড সংঘটিত হোৱাৰ পিছতে অসম জাতীয়তাবাদী যুৱ ছাত্ৰ পৰিষদৰ পূব মাজুলী আঞ্চলিক সমিতিয়ে অঞ্চলটোত অগ্নি নিৰ্বাপক বাহিনীৰ দুখন বাহন প্ৰদান কৰিবলৈ বিভাগীয় কৰ্তৃপক্ষক দাবী জনাইছে । বৃহস্পতিবাৰে বনগাঁও আৰক্ষী চকীৰ সমীপত অগ্নিকাণ্ড সংঘটিত হৈছিল ।
অগ্নিকাণ্ডত কেইবাখনো দোকানৰ ক্ষতিসাধন হয় ৷ আনহাতে, এই দোকানকেইখনেই কেইবাটাও পৰিয়ালৰ উপাৰ্জনৰ একমাত্ৰ সম্বল আছিল । জুয়ে সকলোবোৰ ছাৰখাৰ কৰাৰ পাছত এতিয়া পৰিয়ালকেইটাৰ পানীত হাঁহ নচৰা অৱস্থা হৈছে ।
সেয়ে, শীঘ্ৰেই ক্ষতিগ্ৰস্তসকলক উচিত ক্ষতিপূৰণ দিবলৈ চৰকাৰক আহ্বান জনাইছে অসম জাতীয়তাবাদী যুৱ ছাত্ৰ পৰিষদৰ পূৱ মাজুলী আঞ্চলিক সমিতিয়ে । লগতে বনগাঁও আৰক্ষী চকীত অগ্নি নিৰ্বাপক বাহিনীৰ দুখন বাহন সদায় ৰখাৰ বাবে দাবী জনাইছে । বৃহস্পতিবাৰে বনগাঁও আৰক্ষী চকীৰ নিচেই কাষতে অগ্নিকাণ্ড সংঘটিত হৈছিল ।
সংগঠনটোৰ নেতৃত্বই কয় যে, বনগাঁও আৰক্ষী চকীত অগ্নি নিৰ্বাপক বাহিনীৰ গাড়ী থকা হ'লে অগ্নিকাণ্ডই ভয়াৱহ ৰূপ ল'ব নোৱাৰিলেহেতেন । এই সন্দৰ্ভত জিলা উপায়ুক্তৰ জৰিয়তে সংগঠনটোৱে মুখ্যমন্ত্ৰী সৰ্বানন্দ সোণোৱাললৈ এখন স্মাৰক পত্ৰ প্ৰেৰণ কৰিছে ।
