তেজপুৰ,16 জানুৱাৰী: ভাৰতীয় সেনা দিৱসৰ দিনটোতে অৰুণাচল প্ৰদেশ চৰকাৰে গ্ৰহণ কৰিছে এক বিশেষ পদক্ষেপ ৷ 70 বছৰৰ পূৰ্বে অৰুণাচল প্ৰদেশৰ টাৱাঙৰ ভাৰত-তীব্বত সীমান্তত ভাৰতৰ জাতীয় পতাকা উত্তোলন কৰা প্ৰথমজন সৈনিক ৰেলাংনাও খাটিঙৰ প্ৰতি শ্ৰদ্ধা জনায় তেওঁৰ এটা স্মৃতিসৌধ নিৰ্মাণৰ কথা জনালে অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে ৷ টাৱাঙৰ এখন ৰাজহুৱা সভাত অংশগ্ৰহণ কৰি মুখ্যমন্ত্ৰীগৰাকীয়ে ঘোষণা কৰে যে, অহা ফেব্ৰুৱাৰী মাহৰ 14 তাৰিখে এই স্মৃতিসৌধৰ আধাৰশিলা স্থাপন কৰা হ'ব ৷ তেওঁৰ এই সৌধ টাৱাং জিলা প্ৰশাসনৰ কাৰ্য্যালয়ৰ সমীপত স্থাপন কৰি তেওঁৰ বিষয়ে বৃষ্টিত টোকা সন্নিবিষ্ট কৰা হ'ব বুলি উল্লেখ কৰে মুখ্যমন্ত্ৰীগৰাকীয়ে । ইতিমধ্যে এই বিষয়ে নিজৰ টুইটাৰৰ জড়িয়তে প্ৰকাশ কৰিছে মুখ্যমন্ত্ৰী পেমা খাণ্ডুৱে ৷
উল্লেখ্য যে, মেজৰ বব খাটিং হিচাপে পৰিচিত অসম ৰাইফলছৰ বিষয়া ৰেলাংনাও খাটিঙে মেক মোহন লাইনৰ সমীপত প্ৰথমবাৰৰ বাবে ভাৰতীয় জাতীয় পতাকা উত্তোলন কৰিছিল ৷ 1912 চনত মণিপুৰৰ উখৰুল জিলাত জন্ম হৈছিল মেজৰ বব খাটিঙৰ । তথ্য অনুসৰি তেওঁ 5ম অসম ৰাইফলছত অংশগ্ৰহণ কৰিছিল আৰু দ্বিতীয় বিশ্বযুদ্ধৰ সময়ত ব্ৰিটিছ সেনাক সহায় কৰিছিল ৷ তাৰ পিছত তেওঁ ব্ৰিটিছ মিলিটেৰী ক্ৰছৰ পৰা মেম্বাৰ অব ব্ৰিটিছ এমপিৰে (Member of British Empire) ৰ সন্মান লাভ কৰিছিল ৷
স্বাধীনতাৰ পিছত 1950 চনৰ নৱেম্বৰ মাহত তেওঁ টিৰাপ ডিভিজনত এগৰাকী অতিৰিক্ত ৰাজনৈতিক বিষয়া হিচাপে কৰ্তব্যৰত আছিল ৷ উল্লেখযোগ্য যে, এই গৰাকী অসম ৰাইফলছৰ বিষয়াই শোণিতপুৰ জিলাৰ চাৰিদুৱাৰ পৰা 1951 চনৰ 17 জানুৱাৰীত 5ম অসম ৰাইফলছৰ কনভয়ৰ লগত পদ পথে খোজ কাঢ়ি ফেব্ৰুৱাৰী মাহৰ 6 তাৰিখত টাৱাঙত উপস্থিত হৈছিল ৷ খাণ্ডুয়ে উল্লেখ কৰে যে, স্মৃতিসৌধ নিৰ্মাণ হোৱাৰ পিছত এইগৰাকী সেনা বাহিনীৰ বিষয়াৰ বিষয়ে সকলোৱে জানিব পাৰিব ৷
লগতে পঢ়কঃ ধৰ্ষণকাৰীক ফাঁচীৰ দাবীত উত্তাল টিংখাঙৰ ৰাজপথ
