তেজপুৰ, 11 আগষ্ট: মণিপুৰৰ লিয়াংমাই সম্প্ৰদায়ে এন বীৰেণ সিং নেতৃত্বাধীন চৰকাৰক ৰাষ্ট্ৰীয় নাগৰিক পঞ্জী (NRC) ৰূপায়ণ ত্বৰান্বিত কৰিবলৈ আহ্বান জনাইছে । সম্প্ৰদায়টোৱে দাবী কৰে যে মণিপুৰ আৰু ভাৰতৰ প্ৰকৃত নাগৰিকসকলৰ মাজত সৌহাৰ্দ্যপূৰ্ণ সহাৱস্থান গঢ়ি তোলাৰ বাবে এই পদক্ষেপঅতি গুৰুত্বপূৰ্ণ ৷
মণিপুৰৰ ‘লিয়াংমাই নাগা’ পৰিষদে মুখ্যমন্ত্ৰী এন বীৰেণ সিঙক এখন স্মাৰকপত্ৰ দাখিল কৰি এন আৰ চিৰ দ্ৰুত কাৰ্যকৰীকৰণৰ বাবে আহ্বান জনায় । সম্প্ৰদায়টোৱে কুকিসকলৰ বাবে অস্থায়ী সাহায্য শিবিৰ বা এটা পৃথক প্ৰশাসনিক গোট স্থাপনৰ ক্ষেত্ৰতো আপত্তি প্ৰকাশ কৰে ৷ তেওঁলোকে কয় যে এই কাৰ্যই লিয়াংমাই লোকসকলৰ পৈতৃক ভূমিত প্ৰভাৱ পেলাব পাৰে ৷
লিয়াংমাই নাগা সম্প্ৰদায়ৰ সভাপতি আৰ. মাচুণ্ডুবৌৱে চাৰিটা গুৰুত্বপূৰ্ণ বিষয়ৰ ওপৰত আলোকপাত কৰে যাৰ বাবে চৰকাৰী হস্তক্ষেপৰ প্ৰয়োজন ৷
উল্লেখ্য যে লিয়াংমাই সম্প্ৰদায়ে কুকি জনসংখ্যাত অস্বাভাৱিক বৃদ্ধিৰ অভিযোগ কৰিছে ৷ তেওঁ কয় যে এই বিকাশৰ কাৰণ হৈছে অনিয়ন্ত্ৰিত অবৈধ প্ৰব্ৰজন, বিশেষকৈ ম্যানমাৰৰ (বাৰ্মা) পৰা যোৱা সাত দশকৰ বিদেশী প্ৰব্ৰজন ৷
সভাপতি আৰ. মাচুণ্ডুবৌৱে কয় যে মণিপুৰ চৰকাৰৰ কথিত অৱহেলাৰ বাবে অবৈধ অনুপ্ৰৱেশকাৰীৰ জনসংখ্যাই ৰাজ্যখনৰ জনগাঁথনি যথেষ্ট পৰিৱৰ্তন কৰিছে ৷ বিশেষকৈ লিয়াংমাই-নিৰ্ধাৰিত অঞ্চলবোৰত বেদখল কৰিছে ৷ সম্প্ৰদায়টোৱে আশংকা কৰে যে যদি এই প্ৰৱণতা অব্যাহত থাকে তেন্তে খিলঞ্জীয়া লোকসকলে অৱশেষত তেওঁলোকৰ নিজৰ ভূমিতে শৰণাৰ্থীৰ স্থিতিৰ সন্মুখীন হ'ব পাৰে ৷
লিয়াংমাই সম্প্ৰদায়ে কুকি জনসংখ্যা আৰু গাঁৱসমূহৰ অভূতপূৰ্ব বৃদ্ধিৰ লগতে আইটি ৰোডত চলি থকা হিংসাত্মক ঘটনাৰ ফলত স্থানান্তৰিত লোকসকলৰ ওপৰত উদ্বেগ প্ৰকাশ কৰে ৷ এই স্থানান্তৰে থলুৱা লিয়াংমাই জনগোষ্ঠীৰ মাজত অস্থিৰতা বৃদ্ধি কৰিছে ৷ কঠোৰ সতৰ্কতা মূলক ব্যৱস্থা প্ৰণয়ন নকৰিলে তেওঁলোকৰ ভূমি বেদখল হোৱাৰ আশংকা প্ৰকাশ কৰে ৷
সম্প্ৰদায়টোৱে দাবী কৰে যে ৰাজ্য চৰকাৰে কাংপোকপি জিলাৰ আইটি ৰোড আৰু কৌব্ৰু ৰেঞ্জৰ কাষৰ সাহায্য শিবিৰ আৰু গাঁৱসমূহত আশ্ৰয় লোৱা স্থানচ্যুত ব্যক্তিসকলৰ এক বিস্তৃত অভিলেখ বজাই ৰাখিব । তেওঁলোকে জোৰ দিয়ে যে স্বাভাৱিক অৱস্থা পুনৰুদ্ধাৰ হ'লে এই স্থানচ্যুত ব্যক্তিসকলে তেওঁলোকৰ নিজ নিজ গাওঁ আৰু জিলালৈ ঘূৰি আহিব লাগে আৰু অঞ্চলটোত কোনো স্থায়ী বসতি স্থাপনৰ অনুমতি দিয়া উচিত নহয় ।
আৰ. মাচুণ্ডুবৌৱে কয় যে কাংপোকপি আৰু তামেংলঙৰ কৌব্ৰু ৰেঞ্জৰ কাষত বসতি স্থাপন কৰা লিয়াংমাই গাঁৱবোৰৰ সীমা সুনিৰ্ধাৰিত কৰা হৈছে ৷ যাৰ স্থায়ী বৈশিষ্ট যেনে পাহাৰ, নদী আৰু অন্যান্য স্থান আদি ৷ এই পৰিপ্ৰেক্ষিতত, সম্প্ৰদায়টোৱে মণিপুৰত আন সম্প্ৰদায়ৰ দ্বাৰা পৃথক প্ৰশাসনৰ যিকোনো দাবীৰ তীব্ৰ বিৰোধিতা কৰে ৷
লগতে পঢ়ক: SC on Manipur Violence : মণিপুৰৰ হিংসাৰ প্ৰতিবেদন দাখিলৰ বাবে পেনেলসমূহক ২ মাহৰ সময় উচ্চতম ন্যায়ালয়ৰ
