ৰঙাপৰা,28 ফেব্ৰুৱাৰী: ঢেকীয়াজুলি বিধানসভা সমষ্টিত নাই উন্নয়নৰ কোনো চানেকি ৷ উন্নয়নৰ ঢাক-ঢোল বজোৱা চৰকাৰৰ দিনতেই উন্নয়নৰ ফোঁপোলা ছবি দেখিবলৈ পোৱা গৈছে ঢেকীয়াজুলি বিধানসভা সমষ্টিত ৷ সমষ্টিটোত বিগত প্ৰায় পাঁচ বছৰে দেখা নাই উন্নয়নৰ মুখ ৷ বিধায়ক অশোক সিংহলৰ ঢেকীয়াজুলি সমষ্টিত ৰাস্তা-ঘাটৰ অৱস্থা তেনেই তথৈবচ ৷ সমষ্টিটোত নাই এখনো পকী দলং ৷ বিধায়ক অশোক সিংহলৰ সমষ্টিত বিশেষকৈ মিছামাৰীৰ বাঁহবেৰা গাঁও পঞ্চায়ত এলেকাৰ এৰাবাৰী, লোহাদাং গাঁৱৰ ৰাইজে লোহাৰ জইচ আৰু বাঁহৰ সাঁকোৰ ওপৰেদি বিপদ সংকুলভাৱে যাতায়াত কৰিবলগীয়া হৈছে ৷
বছৰৰ পিছত বছৰ ধৰি মিছামাৰীৰ বাঁহবেৰা-বেলশিৰি লোক নিৰ্মাণ বিভাগৰ পথচোৱাৰ সৈতে সংযোগ থকা এৰাবাৰী-লোহাদাং গাঁৱৰ পথটিৰে স্থানীয় ৰাইজ আৰু ছাত্ৰ-ছাত্ৰীসকলে বৰ্তমানেও লোহাৰ জইচ আৰু বাঁহৰ সাঁকোৰ ওপৰেদি যাতায়াত কৰিবলগীয়াত পৰিছে ৷ আনকি বিপদৰ সময়ত জৰুৰীকালীন এম্বুলেঞ্চো পাৰ হ’ব নোৱাৰে এই বিধ্বস্ত পথচোৱাৰে ৷ ইফালে স্থানীয় বিধায়কগৰাকীৰো আহৰি নাই ৰাইজৰ খবৰ ল’বলৈ ৷ যাৰ বাবে ক্ষোভ উজাৰিছে স্থানীয় ৰাইজে ৷
পৰিৱৰ্তন আৰু উন্নয়নৰ শ্ল’গান দি শাসনৰ গাদীত বহা বিজেপি চৰকাৰখনে বিগত পাঁচ বছৰে এৰাবাৰী, লোহাদাঙবাসী ৰাইজক চৰম প্ৰতাৰণাৰ বাদে একোৱে নিদিলে বুলি গুৰুত্বৰ অভিযোগ উত্থাপন কৰিছে স্থানীয় ৰাইজে ৷
লগতে পঢ়কঃ দিনটোৰ বিশেষ ৰাজনৈতিক খবৰ...
