ৰঙাপৰা, 06 জুন : 9 নং তেজপুৰ লোকসভা সমষ্টিৰ পৰা সাংসদ হিচাপে নিৰ্বাচিত হোৱা ৰঙাপৰা সমষ্টিৰ বিজেপিৰ বিধায়ক পল্লৱ লোচন দাসক বুধবাৰে ৰঙাপৰাত বিজেপিয়ে সম্বৰ্দ্ধনা জনায় ৷ ৰঙাপৰাৰ কমলা ভৱনত ৰঙাপৰা-বালিপৰা ব্লক মণ্ডলৰ উদ্যোগত এই সম্বৰ্দ্ধনা অনুষ্ঠান অনুষ্ঠিত কৰা হয় ৷
এই সম্বৰ্দ্ধনা অনুষ্ঠানটিত পাঠ্যপুথি ও প্ৰকাশন নিগমৰ অধ্যক্ষ ৰাজেন বৰঠাকুৰ , প্ৰসেনজিৎ দেৱনাথ, সুনিল ঘোষ , মিঠুন তাঁতী , কেশৱ উপধ্যায়, ডলি চুৰিণ, বাতাচ ওৰাঙকে ধৰি কেইবা গৰাকী দলীয় কৰ্মী উপস্থিত থাকে ৷ সাংসদ গৰাকীয়ে দিল্লীত সাংসদ হিচাপে শপত গ্ৰহণ কৰাৰ পাচতে ৰঙাপৰাত উপস্থিত হয় ৷ ৰঙাপৰা আৰু বালিপৰা মণ্ডল বিজেপিৰ উদ্যোগত অনুষ্ঠিত হোৱা সম্বৰ্ধনা সভাখনত সাংসদ পল্লৱ লোচন দাসক বিজেপিৰ নেতা-কৰ্মী আৰু পঞ্চায়ত প্ৰতিনিধি সকলে জাপি, শৰাই, গামোচা আৰু ফুলৰ থোপাৰে সম্বৰ্ধনা জনায় ৷ তেখেতে ভাষণ প্ৰসঙ্গত কয় যে এই জয় তেওঁৰ জয় নহয় ৰাইজৰ জয় , সেয়েহে ৰাইজৰ সমস্যাবোৰ সমাধান কৰাৰ প্ৰয়াস চলাব লাগিব ৷ ইপিনে পঞ্চায়ত প্ৰতিনিধি সকলক সাংসদ গৰাকীয়ে গ্ৰাম্য আৰু চাহ বাগিচা অঞ্চলৰ সমস্যা আৰু চৰকাৰী আঁচনি সমূহৰ প্ৰতি লক্ষ্য ৰাখিবলৈ আহ্বান জনায় ৷ ইয়াৰোপৰি তেওঁ ৰঙাপৰা বিধানসভা সমষ্টিত , পূৰ্বৰ চৰকাৰৰ তুলনাত যথেষ্টখিনি উন্নয়ন সাধন হৈছে যদিও বহুখিনি কাম কৰিবলৈ বাকী আছে বুলি সদৰী কৰে ৷ লোকসভা নিৰ্বাচনত পল্লৱ লোচন দাসক ৰঙাপৰা সমষ্টিবাসীয়ে বিপুল ভোটত জয়লাভ কৰোৱা বাবে তেওঁ সমষ্টিবাসী ৰাইজক ধন্যবাদ জ্ঞাপন কৰি ৰঙাপৰা সমষ্টিবাসীৰ উন্নয়নৰ স্বাৰ্থত কাম কৰি যাব বুলি সভা খনত প্ৰতিশ্ৰুতি প্ৰদান কৰে ৷
