ৰঙাপাৰা, ১৫ ফেব্ৰুৱাৰী: দেওবাৰে নিশা শোণিতপুৰৰ ৰঙাপাৰাস্থিত ভাৰত সঞ্চাৰ নিগম লিমিটেডৰ কাৰ্যালয়ত চোৰে লুট-পাত চলায় । ৰঙাপাৰাৰ ১ নং ৱাৰ্ডস্থিত কাৰ্যালয়টোৰ পৰা চোৰে লুটি নিলে ২৪ টা বেটাৰী । কোনো নথকাৰ সুযোগ লৈ নিশা কাৰ্যালয়ৰ দৰ্জাৰ তলা ভাঙি চোৰে চাফাই অভিযান চলায় ।
চোৰে লৈ যোৱা বেটাৰীকেইটাৰ মূল্য প্ৰায় আঢ়ৈ লাখ টকা বুলি কাৰ্যালয়ৰ কনিষ্ঠ অভিযন্তা চুলতান আহমেদে জানিবলৈ দিছে । এই ঘটনাৰ বিষয়ে ৰঙাপাৰাৰ BSNL কাৰ্যালয় কৰ্তৃপক্ষই ৰঙাপাৰা আৰক্ষীক অৱগত কৰিছে । আনহাতে, চুৰিকাণ্ডৰ বিষয়ে বুজ ল'বলৈ সোমবাৰে ৰঙাপাৰাস্থিত BSNLৰ কাৰ্যালয়ত উপস্থিত হয় শোণিতপুৰ জিলা প্ৰৱন্ধক(কাৰিকৰী বিভাগ) মৌচুমী কৰ ।
দেওবাৰে নিশা বেটাৰীকেইটা চোৰে চুৰি কৰি নিয়াৰ সময়ত মূল গে'টখন খোলাৰ বিপৰীতে পকীবেৰ বগাই পলায়ন কৰাৰ সন্দেহ কৰিছে আৰক্ষীয়ে । ইয়াৰ পূৰ্বেও এই কাৰ্যালয়টোত চুৰিকাণ্ড সংঘটিত হৈছিল । সম্প্ৰতি এই সন্দৰ্ভত আৰক্ষীয়ে তদন্ত আৰম্ভ কৰিছে ।
লগতে পঢ়ক:ধুবুৰীত বিজেপিৰ যোগদান সভা
