তেজপুৰ, 31 জুলাই: আজি নটসূৰ্য ফণী শৰ্মাৰ 51তম মৃত্যু বাৰ্ষিকী ৷ মৃত্যু বাৰ্ষিকীত সাংস্কৃতিক জগতৰ অন্যতম কাণ্ডাৰী গৰাকীকলৈ শ্ৰদ্ধাঞ্জলি জ্ঞাপন কৰিলে শোণিতপুৰ জিলা প্ৰশাসনৰ লগতে স্থানীয় লোকে ৷ 1910 চনত তেজপুৰৰ কলিবাৰীত জন্মগ্ৰহণ কৰা শিল্পীগৰাকীয়ে নাট্যকাৰ হিচাপে সকলোৰে মাজত পৰিচিত হৈ পৰে 1948 চনত চিৰাজ, 1955 চনত পিয়লি ফুকন নাটকত সফল নাট্যাভিনয়ৰ পাচতে ৷ অসমীয়া নাট্যজগতৰ প্ৰতি ফণী শৰ্মাৰ অৱদানক সন্মান জনাই তেখেতক প্ৰদান কৰা হৈছিল নটসূৰ্য উপাধি ৷ প্ৰথম অসমীয়া বোলছবি জয়মতীকে ধৰি দেৱদাস,ইন্দ্ৰমালতী, লাচিত বৰফুকন, মনিৰাম দেৱান আদি বহু ঐতিহাসিক অসমীয়া বোলছবিয়ে বহন কৰিছে তেওঁৰ অভিনয় জীৱনৰ সাক্ষ্য ৷ এগৰাকী অভিনেতাৰ লগতে তেওঁ আছিল এগৰাকী সফল পৰিচালকো ৷ কিন্তু মৃত্যুৰ 51 বছৰ অতিক্ৰম কৰাৰ পাচতো আজিলৈকে নিৰ্মাণ নহ'ল ফণী শৰ্মাৰ সমাধিক্ষেত্ৰ৷ ইয়াকে লৈ দুখ প্ৰকাশ কৰিছে তেওঁৰ পৰিয়ালৰ লোকে ৷ বহু চৰকাৰ আহিল আৰু গ'ল ৷ কিন্তু বিশিষ্ট নাট্যকাৰ গৰাকীৰ সমাধিক্ষেত্ৰ নিৰ্মাণৰ কাম প্ৰতিশ্ৰুতি হৈয়েই ৰ'ল ৷
বিগত বৰ্ষতো নাট্যকাৰ গৰাকীৰ সমাধিস্থল নিৰ্মাণৰ বাবে 1 কোটি টকা অনুমোদন দিয়া হৈছিল বুলি উল্লেখ কৰাৰ বিপৰীতে শুকুৰবাৰেও তেওঁৰ মৃত্যু বাৰ্ষিকীত অনুৰূপ কথাই দোহাৰিলে জিলা উপায়ুক্ত মানৱেন্দ্ৰ প্ৰতাপ সিঙে ৷ ইতিমধ্যে নটসূৰ্যৰ সমাধিক্ষেত্ৰ উন্নয়নৰ প্ৰকল্প প্ৰস্তুতিৰ বাবে যো-জা চলাই থকা হৈছে বুলিও উল্লেখ কৰে উপায়ুক্ত গৰাকীয়ে ৷ আগন্তুক 1-2 বছৰৰ ভিতৰত এই প্ৰকল্পৰ কাম সম্পূৰ্ণ হ'ব বুলিও কয় তেওঁ ৷ চলিত বছৰৰ পৰাই আৰম্ভ হ'ব প্ৰকল্পটোৰ কাম ৷ কিন্তু কৰ'ণা মহামাৰীৰ প্ৰাদুৰ্ভাৱৰ বাবে কেইমাহ মানৰ বাবে এই আঁচনি ৰূপায়নৰ কামত পলম হৈছে বুলিও জানিবলৈ দিয়ে উপায়ুক্ত গৰাকীয়ে ৷
উল্লেখ্য যে, নটসূৰ্যৰ মৃত্যু তিথিৰ বাবে আজি বাণ থিয়েটাৰত অনুষ্ঠিত কৰা অসম চৰকাৰৰ সংস্কৃতিক বিভাগৰ নটসূৰ্য ফণী শৰ্মা বঁটা বিতৰণ কাৰ্যসূচীত অংশগ্ৰহণ কৰিব মুখ্যমন্ত্ৰী সৰ্বানন্দ সোণোৱালে ৷ বিশিষ্ট নাট্যকাৰ তথা লেখক ঐশ্বৰ্য্য কাকতি আৰু ভবেশ বৰুৱাক প্ৰদান কৰা হ'ব 2020 বৰ্ষৰ নটসূৰ্য ফণী শৰ্মা সোঁৱৰণী বঁটা ৷
লগতে পঢ়ক: অচল তুলসীবাৰীস্থিত বৃহৎ বস্ত্ৰ উদ্যোগ, ক্ষুব্ধ কৰ্মচাৰী
