শিৱসাগৰ, ৩১ জানুৱাৰী: শিৱসাগৰৰ ৰাজপথত দাউদাউকৈ জ্বলিল এখন চাৰিচকীয়া বাহন । দেওবাৰে শিৱসাগৰ জিলাৰ বেতবাৰী উচ্চতৰ মাধ্যমিক বিদ্যালয়ৰ সন্মুখত দাউদাউকৈ জ্বলিল এখন টাটা ইণ্ডিগ' বাহন ।
ঘটনা অনুসৰি, শিৱসাগৰ জিলাৰ অন্তৰ্গত বেতবাৰী টাইমুৰ আলিত AS ২৩ E ২৬১৬ নম্বৰৰ টাটা ইণ্ডিগ' বাহনখন এগৰাকী মহিলাই ভাড়া হিচাপে লৈ চালকজনৰ সহিতে ডিব্ৰুগড়ৰ পৰা বেতবাৰী হৈ নাজিৰা অভিমুখে ৰাওনা হৈছিল । চলন্ত অৱস্থাতে হঠাৎ সন্মুখভাগৰ পৰা কলা ধোৱা নিৰ্গত হোৱাত চালক আৰু মহিলাগৰাকী বাহনখন ৰখাই নামি যোৱাৰ পিছতেই দাউদাউকৈ জ্বলি উঠিছিল বাহনখন । পৰৱৰ্তী সময়ত স্থানীয় ৰাইজৰ সহযোগত এক ভয়াৱহ বিপদৰ পৰা ৰক্ষা পৰে চালক আৰু মহিলাগৰাকী ।
ইফালে ঘটনাৰ খবৰ লাভ কৰা মাত্ৰকে দুৰ্ঘটনাস্থলীত অগ্নি নিৰ্বাপক বাহিনীৰ লোক উপস্থিত হৈ জুই নিয়ন্ত্ৰণ কৰিবলৈ সক্ষম হয় ।
