শিৱসাগৰ, 20 চেপ্তেম্বৰঃ শাৰদীয় দুৰ্গাপূজা সমাগত ৷ সমগ্ৰ ৰাজ্যৰ লগতে এতিয়া চাহ বাগিচা সমূহতো দুৰ্গা পূজাক লৈ ব্যাপক উলহ মালহ ৷ তাৰ মাজতে বোনাচক কেন্দ্ৰ কৰি শিৱসাগৰ জিলাৰ সোণাৰিৰ বৰাহী চাহ বাগিচাত সৃষ্টি হয় উত্তপ্ত পৰিস্থিতিৰ ৷ অভিযোগ অনুসৰি,অসমৰ বিভিন্ন চাহ বাগিচাৰ শ্ৰমিক সকলে দুৰ্গা পূজাৰ প্ৰাকমুহুৰ্তত 20 শতাংশ বোনাচ প্ৰদান কৰিবলৈ দাবী জনাই আহিছিল যদিও বৰাহী চাহ বাগিচাৰ কৰ্তৃপক্ষই মাত্ৰ 16 শতাংশ বোনাচ প্ৰদান কৰাৰ সিদ্ধান্ত গ্ৰহণ কৰিছিল ৷
উল্লেখযোগ্য যে, অসম চাহ মজদুৰ সংঘৰ সোণাৰি শাখা আৰু বৰাহী চাহ বাগিচা শ্ৰমিক ইউনিয়নৰ একাংশ নেতাই বাগিচা খনৰ শ্ৰমিকসকলৰ লগত কোনো আলোচনা নকৰাকৈ 16 শতাংশ বোনাচ প্ৰদানৰ বাবে বৰাহী চাহ বাগিচা কৰ্তৃপক্ষৰ লগত বুজাবুজি কৰিছিল ৷ এই কথা জানিব পাৰি শুকুৰবাৰে বাগিচাখনৰ শ্ৰমিক সকলে বাগিচাৰ কাৰ্যালয় ঘেৰাও কৰি তীব্ৰ প্ৰতিবাদ সাব্যস্ত কৰে । প্ৰতিবাদৰ ফলত বহু সময় ধৰি বাগিচা খনত তীব্ৰ উত্তেজনা সৃষ্টি হয় ৷ অৱশেষত বাগিচাখনৰ পৰিচালক গৰাকীয়ে 20 শতাংশ বোনাচ প্ৰদানৰ বাবে মালিক পক্ষৰ লগত আলোচনা কৰিব বুলি প্ৰতিশ্ৰুতি দিয়াত শ্ৰমিকসকলে প্ৰতিবাদ সাময়িকভাৱে স্থগিত ৰাখে ৷
