আমগুৰি, ৩ নৱেম্বৰ: শ্ৰী শ্ৰী কৃষ্ণ ৰাসলীলাৰ বাবে শিৱসাগৰৰ আমগুৰিৰ হাফলুটিঙত পূৰ্ণগতিত চলিছে প্ৰস্তুতি । সমান্তৰালকৈ প্ৰস্তুত কৰা হৈছে বিভন্ন ধৰণৰ মুখা । ৰাসৰ বাবে মুখা প্ৰস্তুত কৰাত ব্যস্ত হৈ পৰিছে মুখাশিল্পী দীপাংকৰ নাথো । বিগত ১০ বছৰে এই শিল্পৰে জড়িত হৈ আছে দীপাংকৰ নাথ ।
তেওঁক সংগ দিছে আন ৩ জন যুৱকে । এতিয়া দীপাংকৰ নাথে সুন্দৰকৈ প্ৰস্তুত কৰি উলিয়াইছে পুতনা ৰাক্ষসী, ময়ুৰ, হস্তী, ঘোঁৰা আদিৰ মুখা । অসমৰ বিভিন্ন জিলাত এই মুখাশিল্প প্ৰদৰ্শন কৰি আহিছে দীপাংকৰ নাথে । ক'ভিডসৃষ্ট পৰিস্থিতিৰ বাবে বিগত বৰ্ষত বহু লোকচানৰ সন্মুখীন হ’বলগীয়া হৈছিল মুখাশিল্পীসকলে ।
এইবাৰ সংক্ৰমণ হ্ৰাস পোৱাৰ বাবে মনত সাহস লৈ মহাৰাস অনুষ্ঠিত কৰাৰ বাবে প্ৰস্তুতি চলাইছে যুৱকসকলে । আনহাতে, একাংশ নিবনুৱা যুৱকে এই শিল্পকে উপাৰ্জনৰ পথ বাছি হিচাপে লৈছে আৰু নিজৰ সংস্কৃতি জীয়াই ৰখাৰ প্ৰয়াস কৰিছে ।
পুতনা ৰাক্ষসী, ময়ুৰ, হস্তী এই সকলোবোৰ সুন্দৰকৈ প্ৰস্তুত কৰিছে দীপাংকৰ নাথে । মাজুলীৰ ঐতিহাসিক চামগুৰি সত্ৰৰ ড° হেমচন্দ্ৰ গোস্বামী আৰু জাঁজী জৰাবাৰী সত্ৰৰ মুখাশিল্পী প্ৰদীপ হাজৰিকাৰ অনুপ্ৰেৰণাত মুখাশিল্পৰ কাম আৰম্ভ কৰিছিল দীপাংকৰ নথে । শেহতীয়াকৈ চাৰিজনকৈ যুৱকক সংস্থাপন দিছে দীপাংকৰ নাথে । ডিগবৈ, ধেমাজি, লখিমপুৰ, দুলীয়াজান আদি বিভিন্ন স্থানলৈ মুখা প্ৰেৰণ কৰে শিল্পীগৰাকীয়ে আৰু এতিয়া এই মুখাবোৰে যথেষ্ট সমাদৰ লাভ কৰিবলৈ সক্ষম হৈছে ।
লগতে পঢ়ক:প্ৰবীণ ৰাজনীতিক আব্দুল মুহিব মজুমদাৰৰ শেষ নিশ্বাস ত্যাগ
